Tute nge an nih hriat loten Madhya Pradesh-a Narmadapuram district-ah biak in an hal a, an suasam nasa hle bawk tih Thawhtanni khan police-in an sawi.
Tual chhung mite chuan tribal tamna, Chauki Pura khuaa biak in chhunga bungruate hal a nih thu leh a bang vel pawh a khuin a ur dum vek tih an sawi a; tawngtaina in bangah ‘Ram’ tih inziak a lo awm bawk tih an sawi.
He thil thleng avang hian Indian Penal Code Section 295-na tlawhchhanin mi tute nge an nih hriat loh lakah thubuai ziah luh a ni.
Gurukaran Singh, Superintendent of Police, Narmadapuram chuan a titute hian kum nga kal ta vela sak biak inah hian a tukverha lên zar tichhiain an lut a, a chhung atangin an hal nia a lan thu a sawi a. Biak in hi district khawpui atanga km 40 vela hlaa awm a ni.
Kangmeiah hian sakhaw lehkhabu leh biak in chhunga bungruate pawh a kang chhia tih a sawi bawk.
He biak in hi Evangelical Lutheran Church in America nena inzawmna nei niin tual chhung mite chuan an sawi.
Thawhtanniah vek khan Khandwa khuaah Muslim pa inah tihluihnain Hanuman-a lim dah luih nia sawi a awm a, hei vang hian Hindu leh Muslim inkarah buaina a chhuak deuh va; mahse, police-in an hnawt darh thei a. Sakhaw zuitu pahnih intihbuainaah hian lungin an intawng a, police pawh paliin hliam an tuar.
He thil thlengah pawh hian thubuai pathum ziah luh a ni a, a bultumtu bera puh hi Hindu hruaitu nia inchhal, Ravi Awhad-a a ni.