Congress Party President Lalsawta chuan nimin khan Edenthar Veng, Aizawl-ah an party zawm tharte a lawm lut a. Lawm luhte hmaah thu sawiin, “MNF party-in SEDP nuai thum vuak tluk min tiam a, an pawisa hi a vuai pawh ni mai loin, a lem a ni. A tak a awm lo a, inbumna a ni. Mizorama party-te hian kan mipuite hi bum tawh lo ang u. Dawt sawi ching tawh lo ang u,” a ti.
Lalsawta hian, kum 2018 MLA General Election-a Congress tlak chhan chu eng dang ni loin, kum 10 an sorkar tawhnaah mipuiin an nin vanga tla an nih thu a sawi a. Congress Party thawh that thlir loin an tihsual tlemte a ri ring zawk a, an tih that tam zawk ri a zawi tlat a, chuti nilo se sorkarna siam leh thei an nih thu a sawi.
MPCC President hian, an intiam angin Congress party chuan tlawm takin cheng nuai khat an sem tih a sawi a. MNF erawh SEDP nuai thum sem tura an intiamna chu a tak awm lo a lem a nih thu leh inbumna mai a nih thu sawiin, Mizoram party te hian mipuite bum tawh lo a, dawt sawi ching tawh lo turin a chah.
Mizoramah ram mipuite tan Congress party kawl a en avangin party mipui an phur thar a tul thu a sawi a. “Party mipui chauh ni loin Mizoram mipuite pawh lo phur a, min tawiawm turin ka sawm che u a ni,” a ti bawk.
Congress President-in an party-ah mi thar 44 a lawm luhna inkhawmah hian MPCC Vice President Lal Thanzara pawhin thu a sawi a ni.