North Korea chuan hmun hla tak kap thei cruise missile chu a enchhin niin an ram sorkar chanchinbu chuan a puang a. He ralthuam hian Japan ram hmun tam tak pawh a kap phak.
KCNA news agency chuan kartawpa missile enchhin hi km 1,500 vela thui a thlawk niin a tar lang.
North Korea hi ei leh in leh ram sum dinhmunah pachhe rih hle mah se ralthuam siam lamah erawh hma a la reng.
United States sipai chuan tuna missile an enchhin hi khawvel tana hlauhawm a ni thei tih an sawi a; an thenawm, Japan pawhin ‘ngaihven ngai tak’ niin a sawi.
North Korean chanchinbu, Rodong Sinmun chanchinbuin thlalak a tihchhuahah chuan missile hi a kah chhuahna lirthei (launch vehicle) atanga kah chhuah a ni a, a khamphei zawngin a thlawk chhuak.
KCNA agency chuan missile an enchhin chu ralthuam lama hlawkna tam tak niin a sawi.
Enchhin hi Inrinni leh Pathiannia neih kha niin a tar lang a. An missile-te hian North Korea ram chin tuipuia a tlak hmain a tum tak a kap fuh niin an tar lang bawk.
North Korea analyst Ankit Panda chuan tuna an enchhin tak hi nuclear ralthuam keng thei long-range cruise missile an neih hmasak ber niin a sawi.
UN Security Council chuan North Korea hi ballistic missile enchhin tawh lo tura tiin a hrek a, tun tuma cruise missile ang chi erawh a tel lo.
Council chuan ballistic missile hi cruise missile aiin a hlauhawm zawk niin a sawi a, ralthuam lian leh chak zawk a keng thei a, a kap thui theiin a thlawk chak zawk bawk.
Ballistic missile hi rocket-in a phurh chhuah chi a ni a, cruise missile erawh jet engine hmang niin a thlawk hniam zawk.