- Ruata
Khawvela lirthei ke hnih nei siamtu upa ber pawl Royal Enfield chuan an adventure bike hmingthang tak mai Himalayan thar lo chhuak tur chu tunah hian hmun hrang hrangah an enchhin mek a, an enchhin lai thlalak leh video hi internet khawvel lamah chuan hmuh tur a awm nual a, tunhnaia chhuakah chuan a khawl ri tur a hriat theih a ni.
Himalayan?
Royal Enfield Himalayan hi Royal Enfield ho adventure huangchhunga an bike a ni a. Tunhnaia company hrang hrangin adventure bike an hralh tam chhohah leh India bike rider te pawhin adventure bike an uar chhoh viauah hian lirthei lei tam pawl tak chu Himalayan hi a ni a. Adventure bike hi company hrang hrangin nei mahse India ramah chuan ramdang atanga lakluh khawl lian tak tak hmang adventure bik tihlohah chuan a lian pawl leh khawl pawh hmang lian pawl, lei tam ber pawl a ni mek a ni.
A tharah khawl thar
Tunah hian Himalayan chhuak thar tur hi 450cc khawl thar hlak nen a rawn chhuak dawn a. Tuna chhuak mek hian 411cc, 24.3bhp power pechhuak thei a hmang mek a. He khawl hi khawl chak tha pangngai tak leh tha tak a ni na a duhkhawp lohna te pawh a leitu hrang hrangah sawi a awm ve thin bawk a. A thar tur hi 35bhp vel lai pechhuak thei tura beisei a ni a, transmission pawh 6 speed a neih beisei a ni a. Himalayan ngaina tute tan chuan thu lawmawm tak a ni a, hei hi media report hrang hrangah kan hmu a, company lam atang erawh chuan puan chian a la awm lo a ni.
A khawl ri tur
Tunhnaia he Himalayan chhuak thar tur enchhinnah hian a bike ri tur hriat theihna video a darh leh tawh a. A ri han ngaihthlak hian Royal Enfield signature thump exhaust note an tih, Royal Enfield lirthei ho ri kan hriat than ang kha kan hmu leh dawn niin a lang a ni. Royal Enfield signature thump han tih hian hmalai cast iron khawl hoa ri thum dut dut ang kha chu tunhnaia UCE khawl chhuak hoah chuan kan hmu ta lemlo na a, a ri kalphung erawh a la hloh lo a, tuna Himalayan thar kan hmuh leh turah pawh hian tunhnaia an khawl thar ho exhaust note la mawi tak tho ang hi kan hre leh dawn niin a lang a. Company dang bike ri danglam te nen a inang dawn chuang lo a, a la ri Royal Enfield viau dawn tihna a nih ber chu!
Thildang
He adventure bike thar tur nghahhlelhawm takah hian design inthlak hlawk hlawk kan hmu lutuk dawn lo a. Tuna chhuak mek nen hian a danglamna a tam dawn loh hmel a, hetihrual hian thil hrang hrang rawn thlak erawh an nei neuh neuh dawn tho a ni. A fuel tank hi a len hret hmel a, Super Meteor thara kan hmuh ang LED headlamp, steel tube-in a hual vel chu kan hmuh ve hmel a, luggage rack tereuhte, rear view mirror bial, windscreen te fel et bakah thildang hrang hrang Himalayan thar turah hian kan hmu dawn a ni.
An enchhin mek model-ah hian a hmalamah Showa USD fork leh a hnunglamah monoshock te kan hmuh hmel a, a hnung leh hmaah disc brake, dual channel switchable ABS awm tel kan hmu leh dawn bawk a ni. Himalayan 450 lo chhuak tur hi Royal Enfield bike zinga fully digital display nei hmasa ber tur a ni dawn a, hei hian Bluetooth a keng tel dawn a. A ke lamah chuan tuna Himalayan chhuak meka kan hmuh ang a hmalamah 21/17-inch wire-spoke wheel te kan hmu leh dawn bawk a ni. He bike thar tur hian tubeless tyre a rawn nei maithei bawk a, hei erawh hi chu company lam thupuanah a la chiang ang a. Tuna chhuak ai hian a to zawk ngei hmel a, Rs Nuai 2.16 – 2.23 (ex-showroom) man bawr vel tura beisei a ni.