Nimina Legislative Assembly thutkhawma Home Minister Lalchamliana’n Uniform Civil Code (UCC) dodalna official resolution a put luh chu member-ten an pawm.
Home minister-in resolution a put luh hi ‘He house hian Uniform Civil Code dana siam tura hmalakna emaw rawtna emaw reng reng lungrual takin a do a ni’ tih a ni a. Minister chuan UCC chu dan a lo nih chuan India rama hnam tin leh sakhaw hrang hrang betuten tihdan phung leh hnam dan an neihte a thiah dawn avangin a bik takin hnam tlem zawk leh sakhaw zuitu tlem zawkte tan a him lo niin a sawi.
“A that lohna chhan tur chu India ram chhunga hnam hrang hrangin hnam dan leh sakhaw dan an neihte hrutrual a nih dawn vang a ni,” a ti.
India danpui article 371G-ah Mizorama chengte humhalhna a awm chungin Mizoram pawna Mizo awmte chu UCC hian harsatna a siamsak dawn niin Tawnluia chuan a sawi a. UCC chu India ram inpumkhatna atana thil tha lo leh inpumkhatna tichhe thei a nih thu a sawi.
Sawihonaah Congress Legislature Party Leader Zodintluanga Ralte leh ZPM Legislature Party Leader Lalduhoma ten party nihna dah thaa Uniform Civil Code hman a nih lohna tura lungrual taka do tlan an duh thu leh resolution hi an thlawp thu an sawi.
BJP member awmchhun, Dr. BD. Chakma erawh chuan Law commission of India 21-na in Uniform Civil Code chu a tulna a awm lo va, a tha hek lo tia a lo sawi tawh thu sawiin, hetiang a nih avang hian hetianga lo buaipui hi a la hun lova a hriat thu leh sorkar laipui lamah a dik lo zawngin a thang ang tih a hlauhawm zawk thu a sawi thung.
House Leader Zoramthanga’n India ram chu leilung leh sik leh sa pawh inang lo tak tak, hnam chi hrang hrang inang lo tak tak leh hnam nunphung leh sakhaw hrang hrang biate chenna a nih avangin UCC chu India ramah hman chi a ni lo niin a sawi bawk.
Official resolution hi rorel lai member, C. Lalmuanpuia, legislature party leader pahnih, BJP MLA leh house leader ten an sawi hnuah resolution pu luttu, Lalchamliana’n pawm a dil anga pawm a ni ta a ni.