Aizawl: UD&PA changtu, Deputy Chief Minister Tawnluia’n Mizorama district headquarters tinah bawlhhlawh sawngbawlna hmun, Solid Waste Management Centre (SWMC) din theuh tum a nih thu house a hrilh.
Nimina Legislative Assembly thutkhawmah house member thenkhatin bawlhhlawh sawngbawlna hmun din chungchang an zawhna chhangin a changtu, dy. chief minister chuan Aizawl leh Kolasib-ah te bawlhhlawh sawngbawlna hmun din a nih tawh thu a sawi a. Sorkarin SWMC chu a ngaih pawimawh avangin district headquarters tinah din tura hma a lak mek thu a sawi.
Deputy CM chuan Lunglei leh Champhai-ah te centre tur siam mek a nih thu a sawi a, heng bakah hian Mamit, Serchhip, Saitual, Khawzawl leh Hnahthialah te pawh SWMC siam tura hmalak chhoh tan a nih thu sawiin, a hmunhma leh tul dangte pawh tihfel a nih thu leh heng khaw pangaa SWMC dinna tura concept paper pawh peih fel a nih tawh thu a sawi.
Tuiriala SWMC-in Aizawl bawlhhlawhte a dawl zawh tawk loh avangin hmun dangah SWMC dang siam tura hmalak a nih thu Tawnluia chuan a sawi a. “Hualngohmunah Rs vaibelchhe 16 senga SWMC siam tum a nih thu sawiin, a hna a len avangin PWD kutah awmin, tender pawh chhuah a nih tawh thu leh final stage-ah a awm tawh thu a sawi.
Tawnluia chuan Aizawl west lamah Industrial Growth Centre ram chhungah centre din tum a nih thu pawh sawiin, a ram pawh tihfel a nih tawh thu a sawi a. Sihphir lamah ram an la zawn mek thu a sawi bawk.