Italian Formula 1 team Scuderia Ferrari chuan tun season a an car hman tur SF-23 chu Thawhlehni khan Maranello a an hmunpuiah an phochhuak.
Ferrari car thar hi an team tlankawng Fiorano Circuit-ah driver Charles Leclerc chuan a khalh chhin a. Phochhuah ni ah hian Ferrari tantu mi 500 te a hmunah an tel tir.
Ferrari head of chassis Enrico Cardile chuan an car thar chu nikuma an car tihhmasawnna lian tak a nih rualin engkim a thar hlaka an duan vek a nih thu a sawi.
Cardile chuan car hma lam pum chu a thar vek a ni a, nose, suspension leh wing te an tihdanglam nasat thu a sawi a. Car pianhmang erawh nikum lama an hman ang tho ring chungin kuminah erawh a aia nasa zawka ‘aerodynamics’ lamah nghawng nei tura siam a nih thu a sawi bawk.
Nikum lama Ferrari mutan lian ber zing ami, an engine rintlak tawk lo thin pawh an siamtha tawh niin Cardile chuan an ngai tih a sawi a. Engine chak zawngah pawh hma an sawn niin a sawi.
Thawhlehni hian Ferrari driver pahnihte hian an car thar hi Fiorano-ah an khalh chhin dawn a. Amaherawhchu rim zawka han khalh tak tak erawh pre-season testing-ah bak an nei thei dawn lo.
Season liamta a world champion Max Verstappen eltu Leclerc chuan kuminah an car chu champion pui a tum tih a sawi a. “Kan tum ber chu hnehna chan a ni a, chuvangin car a luh a champion tum hlan ka nghakhlel tawh hle.”
“Nikuma kan car kha hmasawnna lian tak a ni a, kuminah kan chhunzawm a pawimawh. A tir atanga a tawp thlengin kan tan a pawimawh a, chutiang tura car neih chu a pawimawh.” tiin a sawi ve bawk.