India-a BBC pisate chu income tax thuneituten an thil chhuina kal mek zelah an dap.
New Delhi leh Mumbai-a pisate hi UK-a documentary pakhat, Indian Prime Minister Narendra Modi demna lam thu tihchhuah a nih hnu lawka dap a ni.
BBC chuan thuneitute hmalaknaah ‘theihtawpin an thawhpui’ tih an sawi.
Thuchhuah tawi te an siamah, “A hma thei ang berin thil chhui leh thlengte hi chin fel a nih beisei a ni,” an ti.
Documentary hi television-ah chuan UK-ah chauh tihchhuah a ni rih a, Indian sorkar hian ‘India: The Modi Question’ tih hi online-a thehdarh khap a tum a, ‘ram awptu rilru nena inhalna thehdarhna leh India dona’ tiin a sawi.
Thla hmasa khan Delhi-a police-te chuan he film en tuma pungkhawmte a man nual.
Documentary-ah hian prime minister hi kum 2002-a Gujarat chief minister a nih laia Muslim huatna avanga tharum thawhna thlenga a inrawlh dan tar lan a ni.
Eptu, Congress party general secretary KC Venugopal chuan BBC hmunte dap a nih chungchangah hian ‘beidawnna hu chhuak leh Modi-a sorkarin sawisel an hlauhzia’ tihlanna a nih thu a sawi.
“Heti taka mi tihtheihna hi kan dem a. Mipui rorelna kalhmang lo leh mi pakhat rorelna ang chia thil kalpui hi thui tak a kal thei lo,” tiin Twitter-ah a tar lang.
Hetih lai hian Modi-a telna, BJP thupuangtu, Gaurav Bhatia chuan BBC chu ‘khawvel pawla eirukna nasatna ber’ tiin a sawi ve thung.
“India hi eng pawl pawh, tûr a phuh chhuak a nih loh phawt chuan remchanna petu ram a ni,” a ti.
BBC hmunpui dap a ni chu dan ang a nih thu leh sorkar inrawlhna a awm loh thu a sawi bawk.
Chanchinbu zalenna atana beitu, Editors Guild of India chuan BBC hmun dap a ni chu an ngai thutakin an ngaihven hle tih an sawi.
“Sorkar agency-ten sorkar policy leh an inrelbawl dan sawiseltu chanchinbu pawlte chu tihthaihin nasa taka a hrekna chu chhunzawm zel a ni,” an ti.
Amnesty International India-a board pawhin thuneitute chuan ‘BBC chu rorel lai party chet dan sawiselna lam an tihchhuah avangin an tihthaih’ niin a sawi bawk.
Income Tax Department-in thuneihna a neih chu mite ngawihtir nana hmanruaah a hmang niin an sawi bawk.
Tun hnaia BBC-in documentary a tihchhuah hi UK Foreign Office atanga report tihchhuah loh an hmuh behchhana siam niin kum 2002 buaina chhuaka Modi-a hma lak dan nepzia tihlanna a ni.
Gujarat-a buaina chhuak hi a hma ni chiaha Hindu biakzinte chuanna rel kanga mi eng emaw zat an thih atanga intan a ni a. Buainaah hian mi 1,000 chuang, a tam ber Muslim an thi zui a ni.
Foreign Office-in report a siamah chuan Modi-a chu tawrhna thleng tur pumpelh theihna siam theihna kara hma lak lohnaah ‘mawhphurtu ber’ nia tar lan a ni.
Kum 2005 khan US chuan Modi-a hi ram hruaitu, sakhaw zalenna bawhchhe nasate an rama an luh a phalsak loh thinna dan hmangin a visa chu an lo hreng reng tawh.
Modi-a hian chief minister a nih laia buaina chhuaka mawhphur anga puhna hi a pha reng a, ngaihdam pawh a dil duh lo. Kum 2013 khan Supreme Court pawhin hrem theihna khawpa thiam lohna a neih finfiahna tha tawk a awm lo tih a lo sawi tawh.
BBC chuan thla hmasa khan Indian government hnenah hian an documentary chungchang sawia chhanna pe turin a lo ti tawh a; mahse, chhan an ni lo.
Broadcaster hian an film chu ‘zir chianna behchhan’ a nih thu an sawi a. “Huam zau takin mi thlirna an la a, thil thleng tawngtute, mi thiam te leh ngaihdan hrang hrang, BJP mite ngei ngaihdan pawh laa siam a ni,” tiin an sawi.