Liverpool in kum 2023-ah a vawikhatna atan Premier League inkhelah hnehna an chang a. An result a chhiat avanga boruak a rih chhoh lai takin Merseyside derby-ah hnehna pawimawh an chang.
Anfield-ah Thawhtanni zan khan Merseyside khaw club pahnihte an inkhel a. Liverpool mikhualte hi anni ang bawka tun season a che chhe tak, manager thlak ngai an ni a. Sean Dyche hnuaiah Everton in league hmahruaitu Arsenal hneh nghal mahse an thenawm club lakah erawh an inveng tluan thei lo.
Minute 35 chhung Everton in fakawm takin Liverpool an hmachhawn a, nimahsela minute 36-naah counter-attack rang leh hlauhawm tak hmangin Reds in goal an khung.
Everton defender James Tarkowski chuan goal ban tauh perin goal an khung teuh. Heta ball kal hi Darwin Nunez chuan chak takin a tlanlet pui a, Mohamed Salah tan siamsakin Egyptian forward in Jordan Pickford-a lo inrin loh chu remchangah a la a, goal-ah a khung.
Reds hian second half tan atanga minute li a kal leh tihin Everton beiseina an hmet mit a, Pound maktaduai 45 a January thla a lakluh Cody Gakpo chuan Trent Alexander-Arnold ball cross chu a club tana a goal hmasa ber ni turin a khung.
Reds tan kawl a eng
Kum 2023 hi Liverpool tan kum duhawm a la ni lo. League-ah point an hloh hnem a, FA Cup atangin an tla tawh bawk.
Nimahsela an tan kawl a eng tan dawn niin a lang a, tun season a an harsatna lian ber inhliam avanga player an chan hnem chuan ziaawm lam a pan.
Everton lakah hian Virgil van Dijk, Roberto Firmino leh Diogo Jota te substitute bench-ah dah theih an ni tawh a. Jurgen Klopp-a’n duhthlan tur a nei tawh dawn.
Muallaiah kum 18 mi Stefan Bajcetic che vel a hmuhnawm a, midfield sawisel hlawh thin nunna thar petu a ni thei.
Liverpool boss Jurgen Klopp chuan, “Kan inkhel khan kan that ber laia kan inkhel a ang viau a, kha kha thil lawmawm a ni.”
“Kan result avangin kan lawm a, thawk kan la ve thei ta. Kan kheltha chho zel anga, goal chu a lo kal zel ang. Kan inkhelh dan kha kan mamawh tak a ni.” tiin a sawi.