Sipaiten an paih thlak tak, Myanmar mipui sorkara an politician-te hruaitu chuan an rama thuneihna chelh mektute thlak leh an nih theih nan an che chhuak (revolution thlen) dawn tih a sawi.
Thuneihna a inthlak hnua mipui hmaa a inlan hmasak berah Mahn Win Khaing Than chuan an hun tawn mek chu hun thim ber a nih thu leh khaw varin a thlak dawn tih a sawi.
An ram hruaitu ni thinte chuan thla hmasa atanga sipai sorkar thuneihna chu an pawm ngai dawn lo tih a bihrukna atangin a sawi.
Hetih lai hian mipuite pawhin sipai sorkar duh lohna hi an lantir zel a, nimin pawh khan mi panga vel an thi leh nia sawi a ni.
Tual chhung chanchinbute leh doctor pakhat chuan hmar lama jade lung mawi laih chhuahna khawpui, Hpakant-ah venhim hna thawktuten tlangval pakhat an kap hlum niin AFP news agency hnenah an sawi.
Yangon bul lawka Bago-ah pawh tlangval thah a ni tih tual chhung chanchinbu leh a hmututen an sawi.
Tual chhung chanchinbute chuan Yangon khawpuiah hian mi thum thah an nih thu an tar lang bawk.
BBC Burmese leh thil thleng hmutute chuan Inrinni pawh khan mi 12 lai an thi leh tih an sawi bawk.
Myanmar ramah hian February 1-a sipaiten mipui sorkar an paih thlaka an hruaitu, Aung San Suu Kyi-i an hrensak hnu atang khan mipuite chuan khawlaiah pung khawmin duh lohna an la lantir zel.
Suu Kyi-i kaihhruai National League of Democracy (NLD) party hian nikuma inthlanah khan hnehna an chang a; mahse, sipaite hian dik lo tam tak a awm nia sawiin an pawm lo va, tun hi an thlenpui ta a ni.
Sipaiten an man ve lohva biru NLD MP-te chuan pawl thar, Committee for Representing Union Parliament (CRPH) an tih chu an din thar.
Mahn Win Khaing Than chu an hotu ber atan an ruat a. CRPH hian ram dang sorkarte chu Myanmar rama sorkar dik a din leh theih nan an bei ang.