Thla eng emaw zat tihkhawtlai a nih hnuah South Africa atanga lak luh cheetah-te chu Inrinni chhun dar 12:00 hian Madhya Pradesh-a Kuno National Park (KNP) thlenpui an ni dawn ta.
India hian nikum khan Namibia atangin cheetah pariat pawh an lo la lut tawh tih wildlife expert, India-a cheetah a awm leh theih nana hmalaknaa beitu pakhat chuan Thawhtanni khan a sawi.
Zawhte lian chi, a pa pasarih leh a nu pangate hi an chenna thar tura awm tur hian Indian Air Force (IAF) transport aircraft hmangin OR Tambo International Airport, Gauteng, South Africa atangin Zirtawpni zanah chhuahpui an ni dawn tih PTI a hrilh.
South African cheetah-te hi Gwalior Air Force base, Madhya Pradesh-ah Inrinni tukah thlen an ni phawt ang a, darkar chanve hnuah km 165-a hlam KNP, Sheopur chu IAF helicopter-in panpui leh an ni ang.
KNP thlenpui an nih hnuah hian quarantine boma (enclosure)-ah darkar chanve vel dah hran leh an ni dawn bawk.
KNP Director Uttam Sharma chuan quarantine boma 10 an buatsaih tih a sawi a. Pakhatah pahnih zel an khung dawn tih a sawi bawk.
“Inrinni khan zawhte lian chi dawngsawng tura tih ngai chu kan peih vek tawh a ni,” a ti.
Mi thiamte chuan nikum September thla tira South Africa atanga KNP tlawhtuten wildlife sanctuary hi khawvela khawmuala cheng ramsa tlan chak ber chen nan a tlakah ngaiin inpek dan tura ruahmanna hi siam a ni tih an sawi.
Thla hmasa khan ram pahnihte chuan inremna, Memorandum of Understanding (MoU) an ziak fel zui bawk.
South Africa hian zawhte liante hi India tana a pek (donate) a ni a; mahse, pakhat zel man nan leh an awmna sawn nan hian India chuan USD 3,000 zel a seng tih wildlife expert chuan a sawi.
India hian nikum August thla daih tawh khan South African cheetah-te hi lak luh a lo tum tawh a; mahse, an awmna hmun sawn tur chungchangah inremna siam mai theih a nih loh avangin tihkhawtlai a ni.
Khawmualpui danga ramsa sawn tura MoU tihkhawtlai a nih hnua ziah fel a nih hnuah pawh mi thiam thenkhat chuan India-a sawn tur cheetah-te hi July atang khan khung hran an ni tawh a, an hriselnain a tuar nia sawiin an duh vak lo.
Ramsate hi rei tak khung hran an nih chuan an taksa fitness a tlahniam nasa thei niin an sawi.
Hei mai bakah hian September thla laihawla Namibia atanga lo lak luh tawh pariat, KNP thova dah cheetah nen an awmho nghal dawn si a, an hriselna dinhmun inthlau tak chu a thar turte chuan an tuar thei dawn niin an ngai bawk.
Hetih lai hian India-a cheetah a awm leh theih nana beitute chuan South African cheetah 12-te hi boma-a an awm chhung pawhin ramsa an pel theiin an teihawi thei a, harsatna an neih phah viau lo tura an ngaih thu an sawi.
An zinga pakhum hi KwaZulu-Natal Province-a Phinda quarantine boma-ah dah niin pakuate chu Limpopo Province-a Rooiberg Quarantine boma-ah dah an ni tih an sawi.