Kum 2010, February 14-a Zikpuii Pachuau (tuna AMC Councillor ni ta)-in Valentine’s Day denchhena thisen pek runpui a lo huaihawt tawh chu tun thlenga chhunzawm niin, niminah khan thalai 1,032-in mi dang tan a thlawnin an thisen an pe.
Valentines’s Day denchhena thisen pek rûnpui, kum 2010-a Zikpuii Pachuau-in bul a lo tan tawh chu Association for Voluntary Blood Donation (AVBD), Mizoram State AIDS Control Society (MSACS) leh Mizoram hmun hrang hranga blood bank te tanghovin tun thlengin an chhunzawm a. Kuminah hian Aizawlah chuan Chanmari YMA Hall-ah mipa 166 leh hmeichhia 66, an vaiin mi 232-in thisen an pe.
Synod Hospital, Durtlang-ah mi 200 (mipa 150 leh hmeichiha 50)-in thisen an pe a; ZMC, Falkawn-ah unit 100 (mipa 65, hmeichhia 35); Lunglei-ah unit 150; Siaha-ah 94 (M-68, H-26); Champhai-ah 93 (mipa 80 leh hmeichhia 13); Kolasib-ah 73 (mipa 49, hmeichhia 24); Serchhip-ah 11 (mipa 5, hmeichhia 6); Lawngtlai-ah 60 (mipa 52 leh hmeichhia 8) leh Mamit-ah 19 (mipa 13, hmeichhia 6)-in an pe bawk.