Aizawl : Vairengte Police OC H. Lalchawimawia Vairengte atanga sawnchhuah a nih dan chungchangah Vairengtea thalai pawl -Social reconstruction & enlightement (SORE) Vairengte- chuan an lungawi loh thu an sawi.
SORE chuan sorkar hnathawk chu khawi hmunah pawh sawn kual theih an nih thu leh Vairengte OC an sawn tur pawh an ui viau rualin an pawmpui thu erawh sawiin, an hotute hnena an dil anga tun thla chhunga a fapa school kal laklawh exam chhungte pawh nghak thei lova DGP-in tun thla 14-a mawhphurhna inhlan tura a ti erawh an hriatthiam loh thu an sawi a. “Vairengte khaw tan te, ramri chungchangah te leh hnamdang nena buaina a chhuah chang tea theihtawpa ram leh a Mizopuite tana hna a lo thawh ve tawhna te pawh zah zo lova, hnamdang pakhat, Police hotu (DGP) in ama duh dan tea chhuak rum rum tura a tilui tlat hi kan pawm ve thei lo” an ti.
“Midang pawh sawn tel lo leh kumin inthlanpui neih dawna sorkar hnathawkte sawn kual huna sawn mai theih reng an nih laia amah mimal taka sawn chhuah rum rum duhtu Mizoram Police DGP thil tih dan hi kan dem tak zet” tiin, an hotute hnena a dilna anga naupang exam chhung tal Vairengte-ah awm tir rih tura sorkar thuneitu sangte an ngen thu SORE chuan an sawi.
Vairengte Police OC H. Lalchawimawia chuan Police tihmingchhe zawng emaw ram tana thil tha lo emaw a tih an hriat loh thu SORE chuan sawiin, “Aizawl khawpuiah pawh Police officer tha ber nihna lo dawng tawhtu hetiang taka sawn chhuah a nih ngei ngei theih na tura DGP hmalak dan hi kan dem takzet a ni” an ti bawk.