Aizawl: Mizoram Pradesh Youth Congress Committee (MPYCC) chuan MNF sorkar chu sorkar hnathawkte ngai pawimawh tawk loah a puh.
Nimina thuchhuah an siamah, February 13, 2023-a Chief Minister Zoramthanga’n Mizoram budget a pharh zawhah thuthar thehdarhtute a kawmnaah sorkar hnathawkte hlawh pek hun chungchang tehkhin thu-a a sawi chuan sorkar hnathawkte a tibeidawng hle niin an sawi.
Congress Thalai hian sorkar hnathawk tam berte hian an thlabi hlawh hi thla thar tirah lak an duh vek a, thla kipa man chawi ngai hrang hrang leh loan late tan tlai taka hlawh lak a nih hian kawng hrang hrangin harsatna an tawk thin a. A hun taka hlawh lak an duh ngawih ngawih tawh laia finance minister berin ni 1-a lak leh ni 15-a lak a la tehkhin chuan sorkar hnathawkte a tilungngai em em chu pawi an tih thu an sawi.
Sorkar hnathawkten Congress sorkar laia GP Fund an mamawh ang zela withdraw thin angte kha tun MNF sorkarah chuan vana rah ang a lo ni tate hi sorkar hnathawkte ngaih pawimawh lohna lian taka an ngaih thu an sawi bawk.