Aviation lama mi thiamte chuan Air India hian a ropuina neih thin ang nei leh tur chuan ram chhung bakah ram danga huang a zauh a ngai tih chu an ngaihdan a ni a; mahse, India pawh hian a zo ang em tih chu zawhna a ni.
Delhi leh Mumbai khawpui thlasik khaw vawt tak hnuaia intlar a ngai thinte chu zin mite tan thil hautak a ni a, zin mi tam zawk thleng turin India hian a zo lo nia ngaih a ni.
Hetih mek lai hian union budget pharh tharah chuan sorkar laipuiin kum nga lo awm leh tur chhungin thlawhna tumhmun 80 tal siam a tum a, hei hi hmasawnna ruhrel lian dinna tura sum tam tham tak a thehchhuah tur zinga mi a ni.
Indian aviation market hi hripui a len zawh hnuah a thang leh nasa tawh a, ram chhunga zin veivah chu kum khat chhungin 48.9% zetin a pung tih sorkar chuan a sawi a. December, 2022 maiah pawh khan Indian maktaduai 122 zet ram chhunga zin an awm.
India hian khawvel huapah pawh aviation lamah hian than a tum nasa hle a. Centre for Asia Pacific Aviation India (CAPA India) chuan kum hnih lo awm leh tur chhungin thlawhna 1,500-1,700 vel chah lawk tum a ni tih a tar lang.