Commerce & Industries Minister Dr R Lalthangliana’n Aizawl New Market huam chhunga Aizawl City Centre (Annexe) sak mek chu hnathawh tur atanga zaa 50 aia tam thawh zawh tawh a nih thu house a hrilh.
Nimina Mizoram state assembly thutkhawmah Aizawl South II bialtu MLA Lalchhuanthanga zawhna leh member dangte zawh belhna chhangin minister chuan, foreign lane tih thina Aizawl City Centre (Annexe) building sak mek chungchang a sawifiah a. He building hi sorkar hmasa hunlai, 2018-a bultan a nih thu sawiin contractor leh sorkarin inremna an ziah atanga thla khat hnua hna tan tura tih ni mah se, a leilung zirchianna leh building sak phalna dil ngai leh tul dang buaipui ngaite avangin kum khat dawn hnuah building sak hna thawh tan theih chauh a nih thu a sawi.
Covid-19 a len leh tak bawk avangin harsatna tam tak an tawk niin Dr R Lalthangliana chuan sawi a. Hnathawh a chak thei lo nia sawiin, tunah chuan building sak hna chu zaa 50 aia tam zawh tawh a nih thu leh he building-a sumdawng dawr leh seat lo nei tawh zawng zawngte chu an hmun tur pek leh vek an tum thu a sawi.
Commerce & industries minister chuan New Market main building thiah taka Aizawl City Centre chu sorkar laipuia UD&PA department sum, Rs. nuai 400 senga din tur a nih thu sawiin, a enkawl hna chu Mizoram sorkara UD&PA department kut a nih thu a sawi.
Aizawl City Centre chu building changkang tak, India khawpui danga market building-te pawh el pha tura ruahman a nih thu minister chuan a sawi a. “A tunlai viau tura ngaih a ni,” tiin, building chu sak zawh a nih hnuah sumdawng 1,103-te awmtir tum a nih thu a sawi bawk.