Aizawl: Chief Minister Zoramthanga’n Mizorama mau industry-te chu raw material lak luh a harsat avangin a hlawhtling hleithei lo niin a sawi.
Nimina Mizoram state assembly thutkhawma zawhna leh chhanna huna ZPM member Dr Vanlalthlana’n Mizoram Venus Bamboo Products Private Ltd chungchang commerce & industries minister a zawhna chu chief minister chuan sawifiahin mau industry hlawhtlin loh chhan a sawi.
Chief minister chuan sorkar leh mi mal mau industry an dinah tihfuh chiah loh a awm nia sawiin raw material supply tur mau leh rua chu Mizoramah tam viau mah se, industry chu a thleng hleithei lo niin a sawi a. “Hei hi link road awm loh vangte a ni a, mau lian tha kawr kila mi la chhuak turin a man a to lutuk,” tiin, a chi danga kal a nih loh chuan tihngaihna a awm lo niin a sawi.
Mau leh ruate a awm loh avangin industry chu a ding thup a, chung zingah chuan Mizoram Venus Bamboo Products Pvt. Ltd pawh a tel nia sawiin, khawl nei tha tak niin, a kal thei lo tih a sawi bawk a ni.