Local Administration Department Minister K Lalrinliana’n LAD-in vantlang len vahna huan mawi ‘park’ a neihte chu outsource a nih thu sawiin, mi malin an enkawl theih hun chhung tur term chu pawhsei tuma ruahmanna kalpui mek a nih thu house a hrilh.
Nimina Mizoram State Assembly thutkhawma zawhna leh chhanna hunah LAD minister chuan LAD park-te chu hlep neia buaipuiten an enkawl chhunga an cheibawl hman theihna turin a hun chhung pawhsei a tha tia chief minister hnen atanga thurawn an dawn thu a sawi a. Hemi chungchang hi committee-in an ngaihtuah a ruahmanna an siam mek thu a sawi.
Lungleia Laldenga Park chungchang zawhna chhangin LAD minister chuan, “He park hi outsource zingah a tel a; mahse, chhangtu an awm lo,” a ti a. Laldenga park chu sorkarin a ngaih pawimawh thu sawiin, chei that pawh a duha, a theih ang angin department-a minor works thenkhat atanga pawtkhawmin an cheibawl niin a sawi a, tunah hian chei a la ngai hle niin a sawi bawk.
LAD minister chuan Rashtriya Gram Swaraj Abhiyan (RGSA) hnuaiah Mizoramah VC House 150 sak tawh a nih tawh pawh sawiin, computer set 243 an sem tawh thu leh VC 20 hnenah common service centre an pek tawh thu a sawi bawk a ni.
RGSA awmzia pawh sawifiahin VC-te theihna tipung tura training pek bakah tangkai taka mipui rawngbawl hna an thawh theihna tura anmahni tihchakna tura scheme a nih thu a sawi a ni.