Aizawl: DC Conference Hall, Mamit-ah nimin khan Lalnunhlua, Mamit District Bawrhsap chuan NITI-BYJUs Career Plus Program hawnna leh tablet semna a nei.
Lalnunhlua chuan tablet an sem chu an bultanna nise, zirlaite theihtawp chhuaha an zirna atana hmang tangkai turin a chah a. Hmanraw tha nen rilru nei taka zir thin zirlaite chu an hlawhtlin ngei ngei thin thu sawiin online zela thil tih a ngaih tawh avangin zirlaite tana hmanraw pawimawh tak ngaihtuahsaktu, BYJUs te chungah lawmthu a sawi.
Lehkha zir chuan tawp chin a neih loh thu sawiin zirtirtu leh zirlai nu leh pate chu zirlaite tana theihtawpchhuah a, tanlakpui zel turin a ngen bawk a ni.
He hun kaihruaitu, Vanlalhmachhuana, SDO (S), Mamit chuan report pein Lawmnakima, Program Manager, Byju’s-NITI Aayog chuan coaching an pek thin dan tlangpui a lem nen entirin a tar lang.
Kalkhawmte atangin zawhna awmte a chhang nghal bawk.
He hunah hian Govt. Mamit High School atanga Class X pass chhuak, tuna Govt. Higher Secondary School, Mamit-a zirlai, kum 2021 a BYJUs Test nei qualify zirlai naupang 12-te hnenah tablet hlan niin a dawngtute hi engineer leh medical zir turten exam an paltlang thin, Joint Entrance Test (JEE) leh National Eligibility cum Entrance Test (NEET) hmachhawn dan tur training kum hnih chhung a thlawnin pek an ni dawn bawk a ni.
He hunah hian khawtlang hruaitute, zirtirtute leh sawm bikte an tel.