Aizawl: India rama university leh college hmasawnna endiktu, National Assessment & Accreditation Council (NAAC) Peer Team-in nimin khan Government Aizawl West College tlawhin tehfung hrang hrang hmangin an endik.
NAAC Peer Team member-te hi Chairman Dr. Basheer Hasan, Professor, Department of Psychology, Pt Ravishankar Shukla University, Chhattisgarh leh member coordinator Dr. Visakhonu, Principal, Japfu Christian College, Kipfuzha, Kigwema, Kohima, Nagaland te an ni.
NAAC Peer team hian tun hnai kum nga chhunga Govt. Aizawl West College hmasawnna hrang hrang — curricular – zirtir dan leh zirlaiin an hlawkpui em tih te, zirlaite tan infrastructure a tha leh that loh te, zirchhuak tawh te an chhawr tlak zel em tihte, thawhona a that leh that lohte, sum an vawng fel em tihte, zirtirtuten an thiamna atangin thu ziah chhuah (publication) an nei tha em tih leh tehfung hrang hrang hmangin an endik a ni.
Higher & Technical Minister Dr R. Lalthangliana hoin endiktute hi Sangchhin Chinzah, IAS, Director, HTE; Dr. Lalthansangi Fanai, Jt. Director (Administration); Laltanpuia, Jt Director (Administration), HTE; Prof. Benjamin Lalrinsanga (Nodal officer, NEP), HTE; Dr. PL Ramliana, Secretary, Mizoram Scholarship Board leh Prof. Lalnundanga, Registrar; Prof. Lalbiakdiki, Director CDC ten an lo dawngsawng.
India ram zirna sang inpuite hi inthlahdah loa an awm nan leh zirtirna chhawrna awm an nih theih nan sorkar laipui chuan a endiktu atan NAAC hi a din a. Govt. Aizawl West College hi NAAC-in Mizoram zirna in sang awmte zinga a endik hmasak ber a ni a, tuna an rawn endik hi a vawi 4-na a ni.