German champion Bayern Munich in UEFA Champions League quarter-final lut turin dinhmun tha ah an indah a. 1-0 in Paris Saint-Germain khelmualah hnehna an chang.
Thawhlehni zanah Europe club inelna lian UEFA Champions khelh chhunzawm a ni a. Round of 16 first leg inkhel hi Parc des Princes-ah nghah a ni.
Bayern Munich in mikhual an ni chungin inkhel an thunun zawk a. Team hlauhawm zawk ni fo theiin anmahni mikhualtu PSG in beisei an pha lo fo. Minute 53-naah Kingsley Coman hmanga goal awmchhun khungin German champion lai an an chak.
PSG winger hlui Coman hi kum 2020 final a an intawn tumin team pahnih inkar goal awmchhun khungtu ni tawhin Bayern Munich hi a champion pui tawh.
A thlengtu an inpeih lo
Paris Saint-Germain in kumin bul an tan dan avangin team-ah neuh neuh a tam a. Result tha an neih loh leh thin avangin an team chhung boruak chungchang sawi a awm fo.
Inkhel pawimawhah hian inhliam Kylian Mbappe chu bul tan tir thei lo mahse Lionel Messi leh Neymar te an nei. Hlauhawm tur an ni.
Nimahsela 4-4-2 a inrem PSG in beisei an pha lo. Bayern Munich an hlauhawm a, striker maltlat Eric Maxim Choupo-Moting chu Coman leh Joao Cancelo te bakah muallai atangin Leon Goretzka, Leroy Sane leh Jamal Musiala ten an thlawp hneh. Goal hlauhawm an insiam hnem zawk.
PSG in kum 16 mi Warren Zaire-Emery chu bul an tan tir leh a, Champions League knockout inkhel a khel thei naupang ber a ni.
Second half-ah damkawr Mbappe dahluh a ni a, an tlarhma ti hlauhawm sawtin goal hnih a khung a, mahse offside avanga pawm a ni lo.
PSG hi inelna hrang hrangah a zawna vawi thum an tlawmna a ni a. Return leg-ah chetsual an tan a thiang tawh lo.
Eng nge an sawi?
Bayern coach Julian Nagelsmann chuan, “A tir minute 25 chhung kha kan kheltha hle a, inkhel a pum a thlirin team tha zawk an chak. Hnehna pawimawh a nih rualin second leg a la awm.” tiin an hmabak a la awm thu a sawi.
“A tirah khan kan chungnung a, huaisen takin kan inkhel ngam. Mbappe lo luh hnu khan inkhel a danglam a, na zawkin min nawr theih phah a ni.” tiin a sawi belh.