Air India chuan record thar siamin Airbus leh Boeing nen thlawhna thar 470 zet an neih theihna turin inremna an siam a, he thil hi ‘world-class’ nih an tumna kawngah hmalakna a nih thu a neitu, Tata group chairman, N Chandrasekaran chuan a sawi.
India-a national carrier-in heti zat thlawhna a chah (order) hi tum khata American Airlines-in 460 a chah khumin a tam ber a ni a. Hei hian Air India thlawhnate chu ‘mak takin’ a tichangkang ang a, an huam chin pawh a tizau dawn tih Chandrasekaran chuan a sawi.
Hun eng emaw chen airline hi an talbuai hnuah Tata hian kum hnih kal ta khan an lei a, an thlawhna hlui tawhte chu hnuchhawn hret hretin kum nga lo awm leh tur chhungin changkang leh tha zawk neih tumin ruahmanna an siam a. An thlawhna thar chah mekte zinga a hmasa lam chuan kumin kumtawpah vansangah hun an hman hman beisei a ni.
Heti zata tam thlawhna thar an chah hian tun hma lama India rama vansanga ro an lo rel tawhna thin neih let leh an tumzia pawh a tilanga ngaih a ni a. Hei bakah hian ram dangah pawh huang an tihzauhna tur a ni bawk niin mi thiamte chuan an sawi.
Aviation analyst Mark Martin chuan, “Thlawhna chah mekte hian Air India thlawhna rualte chu khawvela airline alliance lian ber, Star Alliance hnuaia awm, Lufthansa leh Singapore Airlines nen huang khatah a dah dawn a ni,” a ti a. “Keiin ka lo thlirna atang chuan Star Alliance-in Gulf carrier a thunun ang mai hian insiam len a tum niin ka ngai,” a ti.
Indian zin mite hi Europe, US leh ram dang an zin dawn reng rengin Emirates, Qatar Airways, Etihad leh Middle East-a airline dangte chu an rinpui ber a ni a. Air India-in thlawhna rual thar a neih hunah chuan hei hi a thlak thei dawn niin Martin chuan a ring a ni.
Thlawhna hlai chi, A350 ang chi pawh Air India hian hman a tum a, hengte hian US leh Australia ramte pawh chawl lovin India atangin a thlawk thleng thei dawn a. India-a awm Indian bakah ram danga awmte tan pawh thil tha lutuk ni thei tura ngaih a ni.
Hetih lai hian aviation website lam buaipuitu, LiveFromALounge.com dintu, Ajay Awtaney chuan Gulf carrier-te chu hneh mai an awlsam dawn lo tih a sawi ve mek bawk a. Anmahni tana ‘rinawm tlat’ an tam tawh a, chuan man thu-ah indona lian tak a awm phah dawn bawk niin a sawi.
Kum eng emaw zat chhung chu Air India hi anmahni dawrtuten an sawisel tawh a. An thlawhna chhung enkawl that a ni lo va, entertainment system an neihte chhiain charging point-te pawh a hmantlak loh nasa tih an sawi thin a. Hetih lai hian Awtaney chuan thlawhna thar neih tawhah dawrtuten tihchangtlun rah an seng mek zel tih a sawi a, mihring leh mi thiam indaih lohna erawh a la awm reng tho tih a sawi.
Air India hian ropui leh tur chuan ‘India piah lam a thlira hmun tam zawk a tlawhpawh a ngai’ niin Awtaney chuan a sawi a. He thil hian tlawh thin tam zawk nei tur leh India-ah ngei pawh thlawhna tum theihna hmun a tam lehzual a ngai niin an sawi.
Air India hi kum tam tak kal taa Tata thovin bul an tan hi kum 1950 chho khan sorkarin a la a, a service a that avangin khawvel huap pawha hriat hlawh a ni.
A hnu lamah erawh sorkarin a enkawl tha tawk lo va, leiba tam tak neiin an ropui tawhna thin neih tumin bei mah se an hlawhchham zel a, Tata hnenah bawk kum 2021 khan $ tluklehdingawn 2.4-in, kum 68 zet hnuah hralh leh a ni ta a ni.