Tripura chief minister hlui, Biplab Kumar Deb chuan sawi zui hlawh tak tur thu a sawi leh ta a, BJP chuan India thenawm, Nepal leh Sri Lanka-ah sorkarna a siam dawn tih a sawi chuan sawi a hlawh hle.
Sorkar laipuiin Rabindra Shatabarshiki Bhawan sakna tur a pek lawmna hun hmanah Deb hian Inrinni khan a sawi.
“Khatih hun laia BJP president, Amit Shah khan huang zauh zela Nepal leh Sri Lanka-ah pawh inbun tum a nih thu a sawi a, an rama hruaitu thenkhat pawh an dawr tawh tih state guesthouse-ah a sawi,” tiin a sawi.
An state-a eptu, CPM leh Congress chuan chief minister-in mipui rorelna kalhmang lo deuh thu sawi a sawi nia sawiin action lak nghal an phut.
Ram inrelbawlna hran daih, Nepal leh Sri Lanka-ah BJP-in sorkarna siam tum anga Shah-an a sawi pawh chhui chian an phut bawk.
“Shah hian a sawi ang hian a lo sawi nia a sawi, mipui rorelna kalhmang lo deuhva sawi hi a dik a nih chuan Narendra Modi-a sorkar khawthlir kalhmang a hriat vek a. Ram dangte politics-a inrawlhna a ni a, India foreign policy pawh a khawih pawi,” tiin Communist hruaitu hlun leh minister hlui, Badal Chowdhury chuan a sawi.
Chief minister hlui hian sorkar laipui atanga sum an hmuh lawm thu a sawinaah hian union budget pharh tak pawh a fak a, “‘Atmanirbhar South Asia’ a tling,” a ti.
“India-in kal a tum dan hi Bangladesh, Bhutan leh Nepal thlenga mahni kea dinna tur lam a hawi a. Modi-a sorkar hian ‘Sab Ka Sath, Sab Ka Vikas’ (mi tin tan hmasawnna) a thupui a ni,” a ti.
“Kum 2014-a NDA a sorkar khan Modi-a hian South Asian Association for Regional Cooperation (SAARC) ramte a kawm a, hetah hian Pakistan prime minister pawh a tel a, hei hi India hian a thenawmte nena than zel a duh vang a ni,” a ti.
Tripura chief minister hlui hian tun hnaia inthlang tur, West Bengal, Kerala leh Tamil Nadu chungchang pawh sawiin, “West Bengal mipuite hian Mamata Didi hi an mangtha tawh a, Modi leh Shah chuan Bengal an thleng tawh. Kerala-ah pawh CPM leh Congress hun a liam tawh a, tun tum hi BJP thuneihna chan hun a ni dawn. Tamil Nadu-ah pawh BJP tel lovin sorkar siam theih a ni dawn lo va. Lotus hi ram pumah a vul zel dawn a ni,” a ti.