Higher & Technical Education Minister Dr R. Lalthangliana’n kum 2018 atanga 2023 chhungin college tuition fee atangin Rs nuai 881 hmuh a nih thu leh fee atanga sum hmuh zawng zawngte college enkawlna atana hman theih vek a nih loh thu house a hrilh.
Legislative assembly thutkhawm neih mekah nimin khan ZLP Leader Lalduhoma zawhna leh member dangte zawh belhna chhangin H&TE minister chuan India Constitution Article 284-in a tar lan danin college zirlaite hnen atanga fee hrang hrang hmuhte chu a zavaia pawngpaw lo hman ngawt phal a nih loh thu a sawi.
H&TE minister chuan, “Tuition fee leh thil dang fee-te hi college tan direct-in a hman theih vek lo va, public account-ah chhunluh vek tur tih a ni, India ram hmun tina hman turin constitution-ah a awm,” a ti a, chutihrual chuan college inrelbawlnate a hautak avangin phal chin awm erawh hman theih tura ruahmanna an siam thu a sawi thung.
Zirlai pakhat atangin tuition fee-ah Rs 1,200 lak a nih thu H&TE minister chuan sawiin, tun hnai kum nga chhunga fee hmuh dan pawh a sawi a. Kum 2018-2019-ah Rs 1,69,00,000; 2019-2020-ah Rs 1,66,82,736; 2020-21-ah Rs 1,63,10,682; 2021-22-ah Rs 1,89,30,300 leh 2022-23-ah Rs 1,93,65,600 hmuh a nih thu a sawi.
H&TE minister-in a tar lan danin sorkar kum 2018-2019 atanga 2022- 2023 chhunga tuition fee atanga hmuh zawng zawng chu Rs 8,81,89,318 a a ni.