Congress president hlui, Rahul Gandhi chuan tun thla tawp hian United Kingdom tlawhin Cambridge University-a business school-ah zirtirna a pe dawn.
UK a tlawh tur hi Twitter-ah tar langin a lo zir ve tawhna hmun tlawh a phur tawh thu leh geopolitics, international relations leh democracy chungchanga mi ropui tak tak nen an inkawm dawn tih a sawi.
“Kawng hrang hranga fing tak tak – geopolitics, international relations, big data leh democracy lam mite nen inkawmna hun tha kan nei thei dawn a ni,” tiin Congress MP chuan a tar lang.
Cambridge Judge Business School pawhin tun thla tawpa Cambridge University-a Gandhi-a an ko let leh thei tur chu an nghahhlelh thu an tar lang ve bawk.
“MBA zirlaite hnenah zirtirna a pe ang a, Big Data & Democracy leh India-China relation chungchangah Bennett Institute for Public Policy, Centre for Geopolitics leh History Faculty, University of Cambridge-a mite nen hmaichhana inkawmna hun an hmang bawk ang,” a ti.
February 24 leh 26 inkarah Gandhi-a hi Raipur, Chhattisgarh-ah Congress 85th plenary session-ah a tel dawn a. He session hi an party-in kum 2024 inthlanpui lo awm tura hma an lak dan tur sawihona tur niin party chhung thil dang dang an sawi bawk ang.