Tun hnaia National Assessment & Accreditation Council (NAAC) endiknaa A+ Grade hmutu, Govt. J. Thankima College hotute chu nimin khan Higher & Technical Education Minister Dr R. Lalthangliana chuan a pisa-ah lengah sawmin Principal Prof. JV Nunchunga hnenah lawmpuina thuziak a hlan.
Dr R. Lalthangliana chuan Govt. J. Thankima College-in NAAC assessment ‘Grade C’ atanga ‘Grade A+’ an hmu chu hlawhtlinna ropui tak a nih thu a sawi a. “Grade hrang hrang pali zuan khum thei khawpa hma an sawnna leh an tumruhna a chhuanawm takzet a, Mizoram tihmelthatu an ni,” a ti a. NAAC assessment-a ‘Grade A’ hmu apiang chu lawmpuina hlan zel a tum thu a sawi.
Govt. J. Thankima College Principal Prof. JV Nunchunga chuan minister-in lawmpuina a hlan chu thinlung takin an lawm tih sawiin, an hlawhtlinna chu thawktute leh zirlaite, a te ber atanga a lian ber thlenga an tanrualna leh Higher & Technical Education department hotuten theihtawp chhuaha tan an lakpui vang a ni tih a sawi a, hma sawn lehzual turin theihtawpin tan an la zel dawn tih a sawi bawk.
NAAC hian GJTC hi vawi thum an endikna niin a vawi hnihnaah khan ‘Grade C’ (CGPA 1.67) an hmu a, theihtawp chhuaha an tanna zarah endik vawi thumna (third cycle) December 15 & 16, 2022-ah ‘Grade A+’ (CGPA 3.31) an hmu a ni.
GJTC-ah hian subject pariat zirtir a ni a, kuminah hian zirlai 1,000 chuang awmin principal leh zirtirtu 40 leh thawktu dang 12 an awm mek a ni.