Dan leh thupek kengkawhtuten Tripura, Meghalaya leh Nagaland assembly inthlan kaihhnawihah Rs. Vaibelchhe 148 hu pawisa, thil hlu, zu, ruihhlo leh inthamna an man tih Election Commission of India (ECI) chuan Ningani khan a sawi a. Kum 2018 inthlana an man, Rs. Vaibelchhe 7.24 let 20 vel zeta tam a ni.
Tripura-ah hian Ningani khan mipuiin vote an thlak tawh a, Nagaland leh Meghalaya-ah hian February 27-ah inthlan a ni ve thung dawn a. March 2-ah vote tlate chhiar a ni ang.
ECI chuan heti taka thil man a tam chhan hi thupek kengkawhtute thawhhona a that vang te, uluk zawka vil vang te, uluk leh chik lehzuala bial ngaihven ngai zual ngaihven a nih vang leh field team tam zawk chhawp a nih tak vangte a nih thu a sawi.
Commission chuan state pathumah hian assembly bial 80 chu chuhtute sum hman chik zual ngaiah an dah tih a sawi a. Tripura-ah expenditure observer 19, Meghalaya-ah 21 leh Nagaland-ah 24 dah a nih thu a sawi.
State pathumah hian ruihhlo lam thil Rs. Vaibelchhe 85.76 zet man niin man zawng zawng atanga 60% dawn a tling a. Thamna lam thil Rs. Vaibelchhe 34.39, pawisa fai Rs. Vaibelchhe 14.05 leh zu Rs. Vaibelchhe 9.31 hu man a ni tih ECI thuchhuahah tar lan a ni.
Man tamna ber chu Meghalaya niin Rs. Vaibelchhe 63.98 hu thil man a ni a, Tripura-in dawtin Rs. Vaibelchhe 44.67 man niin Nagaland-ah Rs. Vaibelchhe 39.19 man a ni bawk.
“Hlawm khata thil man tam zual zingah Dhalai district-ah heroin kg 3.52 zet, Rs. Vaibelchhe 10.58 man chu police-in an man a. Heroin hi East Khasi Hills district, Meghalaya (2.447 Kg) leh Chumoukedima district, Nagaland (2.27 kg)-ah DRI-in an man bawk,” tiin ECI chuan a sawi.
“Inthlanna tur state pathumte hi state leh ram dang nena inrinaa awm a ni vek hlawm a. Damdawi bakah zute hi voter-te rilru hmin nana hmanraw lar tak a ni a, chu chu Election Commission tan pawh hna hautak a ni,” tiin thuchhuahah tar lan a ni.
Commission chuan excise force-te chu ramri kânna leh hmun pawimawhah zu kal vel tur dang tura dah an nih thu a sawi.
“Vawiin thlengin state pathumah hian zu litre nuai thum chuang man a ni tawh a, inthlan zawh fel nan ni a la awm nual bawk a, Meghalaya leh Nagaland-ah inthlan hmain ni a la awm nual a ni,” tiin inthlan viltu chuan a sawi a. Meghalaya-ah hian ram dang atanga lak luh meizial pawh maktaduai 1.7 zet, Rs. maktaduai 3.67 man hu man a ni bawk.