PHE changtu, Deputy Chief Minister Tawnluia’n in tina tui thianghlim pekna tur, Jal Jeevan Mission (JJM) scheme hnuaiah Mizorama khaw 263-ah hna zawh tawh a nih thu leh hmabak khaw 465-te chu kumin chhunga zawh tuma an beih mek thu house a hrilh.
Legislative assembly thutkhawm neih mekah nimin khan zawhna leh chhanna hunah dy. chief minister chuan JJM scheme chu kum 2024 thlenga kalpui tura ruahman ni mah se central lama JJM hotuten Mizoram bik chu an hnathawh tawhte an hmuh atangin kumin chhunga zo hman turin an ngen niin a sawi a. Theihtawp an chhuah thu leh an zo thei ang em tih erawh sawi a la harsat thu a sawi.
He scheme hnuaia tui connection pekna atana thelret pipe hman a nih chungchang zawhna pawh chhangin dy. chief minister chuan, “JJM ministry hian ngaihdan hrang hrang an nei thin a, thelret pipe hi hman phal a nih avanga hmang kan ni,” a ti a. Khaw chhunga tui connection pekna tura hman a nih avangin rintlak thawkhatah an ngai niin a sawi.
Tawnluia chuan JJM hmanga solar pump-te hman a nih vek theih hunah chuan tui thianghlim ni tin litre maktaduai 10.2 an pe chhuak thei tura an ngaih thu a sawi bawk.
Lunglei chawmtu tuilakna chungchang zawhna pawh chhangin Tawnluia chuan, Lunglei tui pump-na chu a upat tawh thu te, thal laiin tuilakna ber Zobawk-ah tui a tlem avanga harsatna a awm thin thu te a sawi a. Hemi avang hian Lunglei Water Supply Scheme chu rintlaka siam turin ruahmanna an siam mek nia sawiin, Mat lui atanga Sairep tlangah tui pump chhovin gravitation-in Lunglei khawpuiah luan luhtir an tum niin a sawi a ni.