AIZAWL: Lunglei district bawrhsap thar, Ramdinliani, IAS chuan nimin khan Lunglei district media mite kawmin Lunglei district hmasawnna tura hmalakna hrang hrangte a sawipui.
DC Conference Hall-a an inkawmnaah hian Ramdinliani chuan sorkar hmalakna hrang hrang puanzar kawngah leh department-te finchhuah kawngah media mite chu thawhho pui a duh thu a sawi a. A tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah.
Ramdinliani hian Lunglei district hmasawnna turin theihtawp chhuah a tum thu Lunglei DC kal chhuak tain district hmasawnna atana CSR tangkai taka a lo kalpui tawh chu chhunzawm a tum thu a sawi a. District mipuiten ei leh bar kawnga harsatna an neih loh nan fair price shop-te tihhmasawn a ngaih pawimawh thu leh hemi kawnga hmalak a tum thu pawh a sawi.
Lunglei District MJA President Laltlanthanga leh mi dangte pawhin thu sawiin an thil ngaih pawimawh leh mamawhte an thlen a, ram leh hnam, district hmasawnna tura lungrual taka hmalak tlan an duh thu an sawi.