Real Madrid in table mawngphah a awm Elche lakah harsatna nei lovin hnehna an chang a. 4-0 a hnehna changin hmahruaitu Barcelona an um chhunzawm.
Nilaini zana Santiago Bernabeu a La Liga inkhelah Real Madrid in barcelona nena an inkar point 8-ah an tihniam a. Inrinni zana Club World Cup final an khelh avangin La Liga a an fixture tihkhawtlai an khel.
Real hian hrem tawk Vinicius Junior an chhawr lo chungin football hlauhawm an khel a. Eder Militao hmanga goal an khung teuh hnuah Marco Asensio chuan Elche defence bum tlangin goal a khung nghal a. Karim Benzema chuan minute 31-na leh 45-naah penalty atangin goal a khung a. Real chanchin a league goal khung hnem ber pahnihna niin goal 229 a khung tawh.
Second half-ah Luka Modric chuan an goal li na a khung a. Brazilian forward Rodrygo chuan goal khung belh theihna hun a nei nual bawk.
Real Madrid coach Carlo Ancelotti chuan, “Kan kheltha hle in ka hria, inkhel kha tha takin kan thunun zawk.”
“Kan goal nawrdanah a hmawr kan bawk tha hle a, lehlam goal-ah kan felfai hle. Chance kan neih hnem bakah an counter-attack lakah kan inveng tha.” tiin a sawi.