Australia-a thil laih chhuahna khur chima chin hriat lohva awm mipa pahnihte chu an thi tih a chiang ta.
Kum 33 mi, Dylan Langridge leh kum 36 mi, Trevor Davis te hi Nilaini khan Queensland-a Dugald River mine-ah, metre 125-a thukah lutin a chim hnan ta tih tual chhung chanchinbute chuan an tar lang.
Metre 25 vela thukah an utility vehicle, drill rig leh drill rig operator nen an tang khawm a ni.
Drill rig operator hi a chhuak thei hlauh va, a thiante pahnih an la tan thu a sawi a, amah hian hliam tenau tuarin enkawl mek a ni.
Khawvel huapa thil lai chhuaktu pawl, Perenti-a thawk, Langridge leh Davis te ruang hi Cloncurry bula khur chhunga theihtawpa zawn an nih hnuah hmuh a ni ta a ni.
“Chhiatna rapthlak tak a ni a, nimina dam taka haw leh tuma chhuak Trevor leh Dylan te chhung te, an thiante leh an hmangaihte thinlung takin ka tawrhpui,” tiin chief executive Mark Nowell chuan Ningani khan a sawi.
An pahnih hian Australia-a thil laih chhuahna hmuna thawkten an chin tak, ‘fly-in, fly-out worker’ an tihte zinga mi an ni a, heng mite hi Australia hmun hrang hrangah hmun kilkhawrah thawk turin an kal kual thin.
Langridge-a hian March, 2020 khan Perenti company-a Barminco a zawm tih Perenti chuan an sawi a. A hnu kum atangin Dugald River mine-ah hian hna a thawk tan zui.
Davis-a hi November, 2021 atangin an thihna hmunah hian a thawk tan a, a hma kumah company a zawm.
Charge-up operator ve ve an ni a, an hna ber chu khur chhung leh a chhehvela puak thei a awm leh awm loh endik vel leh thil puak tur buaipuitu an ni.
Chhiatna a thlen hnuah hian zinc laih chhuahna hmunah hian anmahni zawn a nih avangin hna chawlhsan vek a ni tih a neitu, MMG chuan a sawi.
Khawl lian hmangin chhanchhuaktuten zanah pawh utility vehicle chu pawh tumin an bei a, Ningani tuk khan MMG general manager Tim Akroyd chuan lak chhuah a nih tak thu a sawi.