Transport Minister TJ Lalnuntluanga’n Aizawl khawpui chhungah lirthei khu endikna hmun dah belh tura hmalak mek a nih thu leh tun thla chhunga hawn hman tum a nih thu house a hrilh.
MNF member, Dr ZR Thiamsanga’n legislative assembly thutkhawm neih meka nimina a zawhna leh member dangte zawh belhna chhangin transport minister chuan he thu hi a sawi.
Lirthei khu endikna khawl chu Champhai, Kolasib, Lawngtlai, Serchhip leh Mamit-ah te pawh dah a nih tawh thu a sawi.
MST bus service chungchang zawhna pawh chhangin minister chuan, MST bus enkawlnaah sorkarin sum tam tak a hloh thin niin a sawi a. Hemi avang hian mi mala tlantir duh an awm a nih chuan chu lam chu sorkarin a hawi ta niin a sawi.
“Tunah hian district tlawhpawh tur kawng zauh mek a ni a, zawh fel a nih hnuah MST banner hnuaiah company bus chuan nuam zawkte sevice-tir tuma inbiak mek a ni,” a ti.
Two wheeler taxi permit pek chungchang pawh sawiin transport minister chuan permit chu kum tin pek a nih loh thu leh kum 2022-2023-ah pawh pek a ni tawh lo niin a sawi a. Tuna thalai eizawnna nei loten eizawnna an neih theih nana permit an pek tawh chu a vaiin 3,646 a nih thu a sawi bawk.