Supply Minister K Lalrinliana’n a thlawna buhfai sem mekah Mizoram sorkarin thla tin Rs nuai 214 chuang a chawi belh niin house a hrilh.
Legislative Assembly thutkhawm neih mekah nimin khan zawhna leh chhanna hunah supply minister chuan kumin January atanga a thlawna buhfai sem kalpuia state sorkarin sum a sen dan sawiin, thla khatah buhfai phurh manah Rs 1,97,06,312 an chawi nia sawiin, retailer margin atan Rs 17,72,329.50, a vaia thla tina an chawi chu Rs 2,14,78,641.50 a nih thu a sawi.
Supply minister chuan supply department atanga rawtna lut card var neite tan buhfai rate tihsan chungchang chu cabinet thu angin deputy chief minister chairman-na hnuaiah committee din a nih thu a sawi a, tlawmngai pawl hrang hrang aiawhte nen sawihova ngaihtuah mek a nih thu a sawi.
Sorkarin card var nei tan buhfai kg khat Rs 27 leh duliin a lei a, Rs 15-in a pe leh tih a sawi a, hemiah hian sorkarin sum tam tak a hloh a, chumi vang chuan tun ai hian a rate titam ve deuh a tha lo maw tih rawtna a awm thu a sawi.
Tunhnaiah India ram pumah buhfai man a to a, FCI atanga sorkarin a lei thinna rate-te pawh tihsan a nih thu a sawi bawk.