Europa League round of 16 luh tumin Barcelona leh Manchester United te an inhmachhawn a, Ningani zan Playoff round inkhelah 2-2 in inkhel hmuhnawm tak mai ah an inhnehtawk.
Club pahnihte hi UEFA Champions League final-ah tum hnih an lo intawn tawh hnua an inkhelh leh hmasak ber a ni a. Spotify Camp Nou-ah attacking football hmuhnawm huaisen takin an khel dun.
Inkhel tan atangin team pahnihten tum an nei. An ball chan chu thiam taka hman a goal hlauhawm siam a ni. First half-ah goal lut lo mahse tun season-ah anmahni league a team hmasawn an nih ve ve chhan a hmuh theih.
Xavi Hernandez hnuaia league a hmahruaitu Barca in hma an hruai hmasa. Second half tan hnu lawkah Marcos Alonso chuan Raphinha corner atang vengtu nei lova a awm remchangah la in goal a khung.
United an ngawi rei lo. An thiampuipa a che a, Marcus Rashford chuan dinglam atang ball lalutin goal-ah a khung a, Marc Andre ter Stegen-a’n a goal sir kil a venghim zo lo.
United in an tlo na an lantir. English forward Rashford bawk an ralthuam hlauhawm ber a ni thin. Minute 59-naah a thawhrah atangin goal dang an nei a, Barcelona defender Jules Kounde chuan an lamah a ti lut palh.
United dinhmun a tha, nimahsela dinglam kila che tha tak Leeds United winger hlui Raphinha chuan danglamna a siam. Dinglam atanga a ball cross chu tumah khawih lovin goal-ah a lut.
A tawp lamah Barca in theihtawpin goal an bawh a, United midfielder Casemiro chuan an lamah ti lut teuh in an goal ban a tihper a, mahse English club hi a tawp thleng an tang tluan.
Inkhel zawh lam
United manager Erik ten Hag chuan inkhel zawhah, “Inkhel hmuhnawm tak niin ka hria, attacking team pahnih an ni a, zanin kha chu Champions League inkhel ang mai a ni a, a ai pawn a ropui ang. A tawpah 2-2 a ni a, Old Trafford-ah kan hmabak kan hlen a ngai.” tiin a sawi.
Lehlamah Xavi Hernandez pawhin a team a fak. “Team intluk tak kan ni a, team ropui an ni. An taima a, thahrui an ngah bawk, kan thunun zawk lai a awm thin a, chak thei ve ve kan ni.” tiin inkhel a thlirlet.
Karlehah Old Trafford-ah return leg hi khelh a ni ang.
Juve an la fuh thei lo
Season harsa an hman a la kaltluang a, Juventus chuan an mualah Nantes mikhualin 1-1 in an inhnehtawk.
Juve hi Champions League group stage-ah vawikhat chauh an chak avanga Europa Playoff khel an ni a. Allianz Stadium-ah beisei an pha lo.
Minute 13-naah Ligue 1 a 12-na ni mek lakah hian Dusan Vlahovic chuan goal a khung a, a siamsaktu Federico Chiesa chuan an goal hnihna a khung belh teuh.
Mahse halftime hnuah Nantes in counter-attack rang tak atangin Ludovic Blas hmangin an si phurh an sut.
Juve coach Massimiliano Allegri chuan a team in inven an dah pawimawh nia puhna chu a pha nasa hle. “Hetiang in sawi thin hian ka lung a ti awi lo hle. Engtiklai mahin Juve hi 1-0 lek leka chak turin ka duh ngai lo. Ka team zawng zawng en ula, defence tha ber kan nei ziah a, attack-ah a tha ber kan nih loh pawhin a dawttu kan ni ziah bawk. Milan leh Juve a ka hnuhma te enkir ila, season tin goal 70 atanga 80 inkar hi kan khung ziah.” a ti.