Mizo footballer zinga hlawhtling leh thleng sang ber Jeje Lalpekhlua chuan professional football khelh a chawlhsan thu a puang a. February 16, Thawhlehni zan khan Hyve Aizawl City Hall-ah a thutlukna siam hi a puang.
Mizoram chhuanvawr Jejea hi India ram football a hming langsar, Indian football chanchin a player tha berte zinga langpha a ni a. A record hrang hrangte enin a hlawhtling ber zingah a tel chiang.
A thlahna hunah hian a chhungkhatte, thenrual tha te leh football hruaitute leh chanchinbumi thenkhatte an kal a. Jeje-a hian a khup hliam dam chiang thei tawh lo avangin chawl turin thutlukna a siam tih a sawi.
Mangtha, football
Amah thlahna hunah hian Jeje-a chuan sawiin, “Mihring duhdanah chuan a hmun hma in a ni anga, mahse ka chawlh thu hi ka puang ta mai a ni. Rilruin a la pha a, taksa in a pha tawh si lova. Han ngaihtuah chuan naupan tet atanga ka ‘dream’ ka lo umzui char char kha a ni a, a harsat hle rualin Pathianin a hun a ti a, min hruainaah ka ngai a, vuina tur ka nei lo.” tiin a sawi.
Chiang zawka sawi belhin, “Kum 2012 atang tawh khan na nei chungin ka inkhel char char a. A tira hliam tenau kha ka inkhelhpui thin. Coach ten inkhel tura min ngen chuan, keiin ka lo chak thin si a, ka inkhel leh mai thin.”
“Khatia ka inkhelh lui khan a rei ah nghawng a lo nei zel a. Inkhelh laia ball head tura han zuan te thlengin min nghawng a, chet velah harsatna te a awm thin.”
“Kum 2019 khan ka khup min zai a, a tirah thla hnih vel chawlh ngai tura ngaih kha a aiin a rei ta a. A dam chhoh theih tak loh avangin nasa takin keimah pawhin ka bei a. A damna tur hian Italy te thleng panin kawng hrang hrangin kan inenkawl a. La inkhelh chhunzawm duh viau mah ila a tawpah erawh ka chunga thleng tura ka dah ngai loh a thleng ta a ni.” tiin thutlukna awlsam a nih loh thu a sawi.
Jeje-a a ropui
Indian striker awm tawhte zingah a hriam ber pawl a ni a. Thahrui a ngahna piah lamah a chetranna leh a finna te a hlawhtlinpui a, striker goal awmna hre tak a ni.
Club football-ah Pune FC, Pailan Arrows, Dempo SC, Mohun Bagan, Chennaiyin FC leh SC East Bengal te tan hian inelna hrang hrangah goal 95 a khung hman. India Under 23 tan goal 6 khungin senior team tan vawi 56 inkhelhah goal 23 a khung a. India player ropui zingah Sunil Chhetri, Bhaichung Bhutia leh IM Vijayan te nen huang khatah an awm.
Mimal chawimawina lamah kum 2010-11 khan FPAI Best Young Player Award dawngin a dawn tawh tam zingah AIFF Emerging Player of the Year, ISL Emerging Player of the Year, Fed Cup Top Scorer leh Best Player, FPAI Indian Player of the Year leh AIFF Player of the Year te a langsar pawl an ni.
Jeje-a uitu leh thlahtute pawh an hrawl hle. Chennaiyin FC neitu Abhishek Bachchan leh Vita Dani te, Pune FC CEO thin Chirag Tanna te bakah a inkhelhpui thin Mizo player langsarte an tel a. Anni bakah India player tha Sunil Chhetri, Eugeneson Lyngdoh, Sandesh Jhingan, Gurpreet Singh leh Gouramangi Singh te pawh an tel.