Ningani zan tlai tawh takah khan Assam-a Jorhat district-a bazarah kangmei nasa tak a chhuak a, dawr 150 vel a kang chhia niin police-in an sawi.
Kangthelhna khawl 25 hmangin Jorhat lailia Chowk Bazaar kang hi thelh niin thunun theih zui a ni.
Kangmei hi dawr pakhata electric short circuit atanga intan nia ngaih niin dawr dangte chu rang takin a man kai nghal nia an ngaih thu an sawi.
Mihring thi leh hliam an awm lo va, dawr neitu leh nghaktute chu inkhar tawhin an haw vek tawh tih police chuan an sawi.
Dawr kang tam zawk hi thawmhnaw dawr leh ei chawp dawr an ni a. Jorhat chhunga kangthelhna hmanrua awmten a thelh mih theih mai loh avangin a bul hnaia Titabor leh Mariani khua leh Golaghat district-a mite pawh koh an ni tih thuneitute chuan an sawi.
Kawng a zim bawk a, thelhtute hian a hmun an thleng mai thei lo niin tual chhung mite chuan an sawi.
Kangmei chhuaka thil chân hi Rs vaibelchhe tel man ni ngei tura chhut a ni a, a hnawkte chin fel a nih hnuah a chiang thei chauh dawn niin police chuan an sawi.
Thla hnih lek chhunga Jorhat-a kangmei liantham chhuak vawi hnihna a ni ta a. December khan Marwari Patty-ah dawr tam tak a lo kang tawh bawk.