MNF MLA Lalrintluanga Sailo-in Lengpui Airport-a khualzin bungraw nawrna, trolley vaw chhia anga a puhnaah lungawi loin Congress party hruaitu thenkhatin Assembly House an pan a, thudik sawi fiah turin an phut.
Assembly Session neih mekah nimin khan Aizawl North II bialtu MLA Dr Vanlalthlana private member bill, The Mizoram (Land Revenue) (Amendment) Bill, 2023 a put luh chungchang sawiho a nih laiin MNF MLA Lalrintluanga Sailo thusawi lai member thenkhatin lo hnial buaiin, trolley chungchang an sawi chhuah chu Lalrintluanga Sailo pawhin sawi chhuakin, “Vanapa Hall hnuaiah trolley tam tak mai a awm a, hei hi Lengpui trolley kan hmanlai kha chhu chhe chawpin an lakhawm niawm tak a ni a, hengte pawh hi department lam hian FIR kan thehlut dawn nge tih ngaihtuah leh tur kan ni a…,” a ti.
MNF MLA thu sawi lo hriain Congress party hruaitu thenkhatin Assembly House an pan nghal a, house an thlen hmain Magistrate-te nen an inbia a, hemi hnuah boruak tha lo thleng awm loin Congress party hruaitute chu Bhavan-ah an kir leh nghal a ni.
MPCC atanga Action Committee, minister hlui, Vanlalawmpuii Chawngthu, MLA hlui Chalrosanga leh party hruaitu Assembly House tual pante hian, “Dawta rorelna sang ber Assembly House chhunga min puhna hi Assembly House-ah ngei thu dik sawifiah leh turin kan phut a, a tih loh chuan Congress mi leh sa kan inveng zo lo vang,” tiin magistrate hnenah an thlen a. Magistrate pawhin an thu thlen chu a lo hrilh chhawn tur thu a lo hrilh a ni.
Nimin chhun dar 12 vel atang khan MPCC-in Lengpui Airport chei that hna thawk meka hna thawh nana trolley hman avanga chhiate PWD changtu, Chief Minister Zoramthanga hnena pek tum nia an hriat avangin, Mizoram Assembly House leh a chheh velah police duty-tir an ni.
Hun eng emaw chhung police duty-ten Assembly House chheh vela lirthei leh mihring kal an dan hnuah chawhnu dar 2 bawr velah kawng dan hi an titawp a ni.
Hetih lai hian MPCC chuan thuchhuah siamin nimin chhun dar 12-a J. Thankima College-in NAAC atanga Accreditation A+ an hmuh lawmna Vanapa Hall-a an neih turah chief minister chu khuallian niin a hmanpui dawn tih J. Thankima College thuneituten MPCC President Lalsawta an ngenna chu zahawm a tih avangin MPCC Action Committee-in Programme siam tura ruahmanna an neihah J. Thankima College Programme tibuai thei turin chief minister chu an dang dawn lo tih a lo hrilh nia sawiin, “MPCC president sawi angin kar tina MPCC Friday Political Session, Congress Bhavan-a neih thin bak programme dang siam a ni lo a. Vawiinah Congress Party hian khawi hmunah mah mipui che vel tibuai turin programme a siam lo,” an ti.
MPCC tar lan danin, sorkar lamin mipui tiralkhel takin police thahnem tawk tak chu Aizawl Press Club bul leh Mizofed Petrol Pump bul, Treasury Square, Aizawl-ah a duty-tir a ni.