- George L. Ralte; Member, Mizo Academy of Letters
Mizote hi ram leh hnam humhalh duh tak kan nih mai bak ah kan ngaih pawimawh zing a langsar tak a ni awm e.Hun rei tawh tak atang khan vawi tam tak Mizoram a tlawmngai pawl lian ber YMA pawhin kumpuan thupui atan a lo hmang tawh a ni.Ram leh hnam humhalh chungchang hi vawi tam tak a thu chuan kan sawi zingin a thu chuan kan vei tlang hle niin a hriat a, amaherawh chu kan ram leh hnam hi a him tawkin kan hria em? tih zawhna chhan har tak a ni awm e.He kan ram leh hnam hi a him lo a nih chuan tu nge mawhphur ang? kan in puh kual mai mai te hian a hriat theih a ni.
Ram leh hnam humhalh han tih hian a kawng a zauvin sawi sen a ni lova.Mi thiam ten ram leh hnam humhalh a ngaih zia leh a pawimawh zia an sawi tam tak hi ngai thla liam mai lovin kan thu ngaih thlak thin te hi a tangkai tak a hmang chhunzawm a, zawmtu kan nih tlang zel hi a hun tawh tak zet a ni.Nitin a hun kan hman thinna te hian ram leh hnam humhalhna lam hi kan hma lakna langsar zing a mi ni thei zel se la, ram leh hnam humhalh kawng ah hian a zung kan la kar mek emaw a zar kan thlak emaw a thenin a tang kan hlawi emaw a thenin a bul kan kih te a nih ngawt loh chuan kan in thian seng dawnin a lang lo.Ram leh hnam humhalhna daltu sualna te, hlep rukna te, zawmthawtna te leh tha ni a kan in hriat anga min awm tir thei lo tu hi theih tawp a kan zawn chhuah hi ram leh hnam humhalhna atan hian mitin ten kan tih mak mawh a ni.
Thuthlung hlui a Israel humhalh duhtu danglam ngai lova kha tuna kan rin mek Pathian hi a ni.Chuvang chuan ngaih dan mumal tak neih hi a va hun tawh tak em.A var chu a var kan tih ngam a, a dum chu a dum kan tih ngam a hun ta.Mi thahnemngai ten ram leh hnam humhalhna kawnga hma an lo lak mek laiin hnam dang nupui leh pasal lo neih hi thil zahthlak a va ni teh lul em.Ram leh hnam humhalh chungchang ah hian kan ram a sawrkarna lo siam tawh kan mawhpuh a ni mai thei e, eng emaw chen chu mawhphurhna lian tak chu an nei.Chumi ai tak chuan kei mahni theuh hi kan pawimawh a ni.Kan ram leh hnam humhalh chungchang hi kan ram hruaitu te kut ah dah mai lovin Mizoram mipui te hian he kan ram leh kan hnam kan humhalh zel theih nan kan thiamna leh kan finna te kan ram leh hnam humhalhna atan hian kan awmna hmun apiang theih tawpin tan i la thar zel ang u.
Ram leh hnam rawngbawlna pawimawh tak hi feh chhuak thei lo te pawhin kan awmna hmun apiang ah Pathian hnen a tawngtaina nen tan kan lak hi a pawimawh tak zet a ni.
Ram leh hnam kan humhalhna kawng ah hian a hma lama thai lan tawh ang khan mawhphurhna lian tak mai kan nei a.Kan ram leh hnam hian hmasawnna ropui leh chhinchhiah tlak tak a neih zel theih nan engkim ti thei kan Pathian chakna rinchhan chung zelin kan ram leh hnam hmelma hneh zel turin i in buatsaih zel ang u.
Kan vanglai hun leh ni zawngte,
kan ram tana hlan zelin,
Fam dairial pawh chang ila,
kan sakruang MIZORAM tan.