Education Minister Lalchhandama Ralte-in Samagra Shiksha hnuaia thawkten sorkar hmasa aiin MNF sorkarah hlawh an la tha zawk nia sawiin Samagra hnuaia thawkte hamthatna tur hrang hrang siamsak an nih thu house a hrilh bawk.
Nimin Legislative Assembly thutkhawma zawhna leh chhanna hunah education minister chuan Federation of Mizoram Samagra Employees (FEMSE) zawmtu association 10 inziak lut zingah hlawh la thei lo an awm lo niin a sawi a. “A hun taka hlawh lak loh chang chu nei ve mah se, MNF ministry-ah hlawh an la tha a, sorkar hmasaah kha chuan thla ruk hlawh lak lohte pawh an nei,” a ti.
Kumin January leh February thla hlawh pawh February thla ral hmaa pek an ni dawn niin education minister chuan a sawi a, chumi atan chuan sum pawh a awm vek tawh nia sawiin, tuna hlawh an pek tlai chhan chu an hlawh an tihpun avanga increment an neihte chhut fel a tul vang niin a sawi a. Thawktute pawhin an hrethiam viau tura an ngaih thu a sawi.
Education minister chuan sorkarin sum harsatna a hmachhawn mek karah Samagra Shiksha hnuaia thawk mi 5,000 chuang, an thawh hlim atanga hlawh ngai la ngar ngarte chu tun sorkarin an hlawh a tihpunsak thu pawh sawiin, “50% DA anga tihpunsak an ni,” a ti a. An milpui zitirtute angin kum riat an thawh tlin tawh chuan 5% DA tihpunsak an ni anga a, kum 16 thawk tling tawhte chu 10%-in an tipung tih leh senior leh juinor-te pawh an thawh rei chuan hamthatna tha zawk nei turin ruahmanna an siamsak tih a sawi bakah medical allowance atan thla tin Rs 1,000 an pe tih a sawi.
Budget session-a finance minister-in budget a pharh takah khan Samagra hnuaia thawkte hlawh leh hamthatna dawn tihsanna turin Rs. vaibelchhe 52.98 dah a nih thu a sawi bawk.
Education minister chuan sikul enkawlna tura grant pek thin chungchang pawh sawiin, “Hemi kan pek dan hi enrollment base-in a ni,” a ti a, naupang pakhat atanga 30 neite hi Rs 10,000 pek an ni a, 30-100 te Rs 25,000, 100-250 neite Rs 50,000 leh naupang 250 chung lam neite chu Rs 75,000 an pek thu a sawi bawk.