BJP Mizoram state spokeperson Lalremsangi Fanai chuan chief minister Zoramthanga kaihhruai MNF sorkarah mipui beiseina a beidawng mek zel niin a sawi.
Nimina Aizawl Press Club-a thuthar thehdarhtute a kawmnaah Lalremsangi Fanai hian, sorkar kum thar atana finance changtu chief minister Zoramthanga’n budget a pharh takah hnathawh dan tur tar lanna Allocation of business-ah awmze nei miah loin sorkar a kalpui tih sawiin, “Chumi avang chuan assembly house chhunga Minister leh MLA te thusawi, zawhna leh chhanna pawh a inkawkalh nuaih a ni,” a ti.
Lalremsangi Fanai hian, sorkar leh mipuite tana manganna rapthlak ber chu sum puk leh mipui leiba pung a ni tih sawiin, MNF sorkar thara finance changtu chief minister Zoramthanga’n budget a pharh hmasak berah sorkar sum puk (state borrowing) tih a lang kulh a. Open Market Borrowing leh NABARD atangin cheng vbc 806.29 puk turin sawi nghalin, puk belh dan a dap zel tur angin a sawi zui nghal a. Chumi puk policy hmang chuan puk belh zelin mipui leiba a pung nasa tulh tulh a, a rulhna harsatna vangin leiba thangah an awk ta tih a sawi.
MNF sorkarah mipui leiba pung chho zelin kum 2023 chuang kai meuh chuan mipui leiba cheng vbc 13,584.80 niin, ram inrelbawlna pumpui atan ruahman zat cheng vbc 14209.94 deuh thaw leiba ramin a nei dawn ta niin a sawi bawk.
BJP thupuangtu chuan MNF sorkar chu state assembly chhung leh politics huang chhungah mipui hmaah dawt an sawi nasa tih sawiin, kum 2019 atanga kum li chhungin SEDP cheng vbc 2,363 dah tawh a, heta tang hian dik tak leh tha takin sem nise chhungkaw 60,000 hnenah Rs 25,000 chauh ni loin cheng nuai thum aia tam pawh a daih niin a sawi.
Kum 2023-24 budget atan SEDP cheng vbc 595 sawi lan belh leh cheu hi, mipui thawhchhuah cheng vbc 2958 hman khawlohna tur a ni tih a chiang vek tawh chunga, SEDP cheng vbc 25 duh hawi zawng zawng a hman theih (untied funds) la awm chhawng cheu te hi Mizo mipuite zah lohna a nih thu a sawi bawk.
Lalremsangi Fanai hian, Finance leh chief minister Zoramthanga’n mipui leiba tipung ringawt zawnga Mizoram a enkawl dan hi ram tan a him lo nia sawiin, “CM Pu Zoramthanga kaihhruai MNF sorkar hian thla ruk (6) awrh rorelna hun a neih chauh tawhah hian mipui leiba tipung zawnga hma la tawhlo turin kan ngen,” a ti a ni.