Mizoram Baptist Kohhran thalai – Mizoram Thalai Kristian Pawl (MTKP) rorel inkhawm chu February ni 17 (Zirtawpni) khan BCM Biak In, Tuipui D-ah neih niin, Mizoramah tun aia rorelna dik a awm theihna turin MTKP-in hma la rawh se, an ti.
Ruihhlo thatloh zia inzirtir rawtna leh MTKP-in TKP memberte intodelh tura zirtirna buatsaih rawtnate pawh MTKP rorel palai te chuan an pawm a. BCM-in damdawi In a neihah te lehkha pawimawh te chu a theih chin chinah Mizo tawnga ziak rawtna leh raltlante tanpuina pek ve rawtna pawh an pawm.
TKP unit tin ten mahni remchan anga plastic bawlhhlawh te chhar khawm hnatlang vawikhat tal neih rawtna leh TKP unit tin te Youth Centre puala vawikhat fehchhuah rawtna pawh MTKP rorel palaite chuan an pawm bawk.
TKP hian Pastor bial 92-ah unit 429 a nei mek a. TKP member mipa 29105 leh hmeichhia 18119, an vaiin 47224 an awm mek. Tuntum MTKP rorel inkhawmah hian palai 554 telin, Fellowship department-in budget ceiling a siam Rs. nuai 15 chu an pawm bawk a ni.