Kum 10 chuang lo awm leh tur chhunga khawmuala cheng chi ramsate India-a awmtir thar leh tumna kal mekah India chuan South Africa atanga a lak luh cheetah 12-te chu a ram chhungah a chhuah ta.
Asiatic cheetah an tihte hi pelh nasat leh an awmna tur hmun zim zel avangin kum 1940 chho vel atang khan India-ah hian hmuh tur a awm tawh lo a ni.
Kum 2020 khan India-a Supreme Court chuan a chi dang deuh, African cheetah an tihte chu ‘uluk taka an awmna tur hmun thlangin,’ enchhinna atan lak luh turin thu a lo titlu tawh a ni.
Indian Air Force-in Twitter-a thlalak an dah chhuahah ramsate hi an awmna tur bawm chhunga khunga ‘darkar 10 zet Johannesburg atanga thlawhpui’ an nih hnuah India-a an luhpui an tilang.
Helicopter-in Kuno National Park-ah an phur lut zui bawk.
Zawhte lian chite hian mikuma Namibia atanga lo lak luh tawhte an zawm dawn a ni.
Kar kal ta tir lamah khan Kuno National Park Director Uttam Sharma chuan an thlen hlimah hian khung hran an ni dawn tih a sawi.
Heng cheetah 12-te hi July atang khan South Africa-ah pawh khung hran an lo ni tawh.
Wildlife lama mi thiamte chuan rei tak khung hran hi cheetah tan a tha ber kher lo tih an sawi a, an hriselna leh an taksa fit-na atan a pawi thei niin an sawi.
Hetih lai hian Sharma chuan zawhte lian chite dawngsawng turin ‘an inpeih vek tawh’ tih a sawi ve bawk.
Hetianga India-a cheetah awmtir lehna hian tual chhung mite eibar dinhmun a chawi kan dawn bakah zawhte lian chite tana khawsakna tur hmun a tipung thei dawn nia ngaih a ni.
Hetih rual vek khian ramsate awmhmun sawn hi a ‘risk a sang’ hle a, park-a an khawsak tak tak hnuah phei chuan thil hlauhawm ni theiah an ngai ve tho.