Aizawl: Commerce & Industries Minister Dr R Lalthangliana’n Bangladesh nena insumdawn tawnna tihlawhtling tura theihtawp an chhuah zel thu a sawi.
He thu hi kar kalta Inrinnia ‘Lunglei Market & Trade Centre’ sak tan mek lungphum a phumnaah Dr R Lalthangliana chuan a sawi a. “Ram dang nena insumdawn tawnna kawngah theihtawp kan chhuah mek a, Indo-Bangladesh border trade pawh a hmunah ngei kalin Bangladesh sorkar hotute nen pawh kan sawiho fo tawh,” tiin, he insumdawn tawnna atan hian central sorkara commerce ministry-ah DPR Rs Vbc 550 an thehluh fel tawh thu a sawi.
Dr R Lalthangliana chuan Lunglei-in sumdawnna hmun tha zawk an nei thei tur chu lawmawm a tih thu a sawi rualin, Lunglei district chhunga hmasawnna ruhrel pawimawh an neih chhoh zel tur thu a sawi a. “Lungleiah Geology & Mining Regional office, mi 15 thawhna tur hawn tum a ni,” a ti bawk.
Integrated Laboratory, Civil Hospital, Lunglei pawh peih fel tep a nih tawh thu health minister chuan sawiin, naupang damlo enkawlna (Pediatric ICU) ruahman mek a nih thu leh Tawipui PHC building pawh hawn theiha peih fel a nih tawh thu a sawi.
Inkhawma an tar lan danin Rs vaibelchhe 14.3 senga sak thar tur, Lunglei Market & Trade Centre-ah hian dawr 339 awm tura ruahman a ni a, market office leh police beat post-te a awm dawn bakah lirthei ke li nei 30 leh lirthei ke hnih nei 71 lenna tur parking pawh siam a ni dawn.
Lungphumna inkhawmah hian HPC Vice Chairman Lawmawma Tochhawng leh NEC-a Tourism & Industries Director Lalrodingi ten thu an sawi bawk.