Aizawl: Inrinni khan Chief Minister Zoramthanga’n Govt. Serchhip College Administrative Building sak tur lungphum chu a phum a, Mizoram chu ram hausaah siam theih a nih thu a sawi.
College tuala lungphumna pual inkhawmah chief minister hian Mizoram chu thlirna thenkhat atang tlangram kalpawh harsa tak, tihhmasawn dawn pawha hautak tak anga ngaih theih ni mah se, hmasawn tura theihna tha tak nei a nih thu sawiin, “Ram min petuin min pek chhan a awm a ni tih ngaihtuahin, ram hausaah kan siam thei a ni,” a ti.
Chief minister chuan hripui leng avanga hmasawnna hnathawhin tuar phah mah se, boruak zia chho zelah sum harsatna karah pawh tunah sorkarin theihtawp chhuahin hna a thawh zel thu a sawi.
Serchhipah hmasawnna tur hmachhawp pawimawh tak tak awmte chu tha taka bawhzui a niha mi dang tan entawntlak an nih ngei a beisei thu chief minister hian a sawi a. College-in hma a sawn dan leh tihchangtlun kawnga an inlungrualna chu fakawm a tih thu a sawi bawk.
Govt. Serchhip College Principal K. Laldinpuii kaihhruai inkhawmah hian minister. Er. Lalrinawma leh Serchhip DC Nazuk Kumar te pawhin thu an sawi.
Special Assistance to States for Capital Investment (SASCI) atanga sum sanction Rs. nuai 650 hmanga sak tur, Govt. Serchhip College Administrative Building hi February 27, 2023 atanga sak tan tur niin kum hnih chhunga zo tura ruahman a ni a. Chhawng li awmin, chhawng zawng zawng zau zawng belhkhawm chu 1,490.43 sq.m a zau tura ruahman a ni.