Kar liam taa in lian tak tak tam tak a chimna hmunah hian inthiarna hmunte pawh a chhiat vek ve tho avangin damdawi thiam leh mi thiamte chuan khawsak a thianghlim tawk thei lo va, hri a len chiam an hlauthawng hle.
Turkish Health Minister Fahrettin Koca chuan Inrinni khan ril lam fel lo leh thawkna lama buai an pun thu a sawi tawh reng a, hetiang na nei hi an la tam em loh avang erawh chuan vantlang himna a derthawng tan nia ngaih tur erawh a la ni lo tih a sawi.
“Tuna kan ngaih pawimawh ber chu vantlang hriseina tiderthawng thei thleng thei do leh natna inkai thei a darh lohna tura ven a ni,” tiin Koca hian chhim lam, Hatay province-a thuthar lakhawmtute a kawmnaah a sawi.
Tanpui hna thawktu pawlte chuan mipuite hian thil chhiate avang hian thla eng emaw zat chhung puihna an mamawh dawn niin an sawi.
Turkey leh Syria-ah hian lir a nghin atanga chawlhkar hnih dawn a liam hnuah pawh chin hriat loh tam tak an la awm a, engzat nge pawh sawi mai harsa khawp a la ni.
Turkey-ah chuan chhungkaw tam takin thiin emaw, dam emawa an lainate hmuh hlan an nghakhlel hle a. Hetih rual hian in sak dan hmanga dik lo taka thil lo tite laka an thinrimna a sang mek a, khawpui tihchangkan tum luata in leh sumdawnna hmun tam tak tihderthawn a lo ni tih an hriatte chuan an rilru a tina hle.
Hetianga in lian chim zinga pakhat chu Antakya-a Ronesans Rezidans (Renaissance Residence) a ni a, mi za chuang thi an awm phah.
“Lirnghinga him tur anga sawi a ni a; mahse, a taka thil thleng chu hetiang hi a ni si,” tiin he block-a cheng a unaupa chântu, kum 47 mi, Hamza Alpaslan chuan a sawi a. “Mangkhawng a ni ringawt. Cement leh thir mumal taka phan a awm lo va, hremhmun dik tak a ni,” a ti.
Turkey chuan in chimah te hian a mawhphurtu chhui chhuah ngei an tiam a, tunah hian mi 100 chuang an man tawh a, heng zingah hian in satu leh a duangtu pawh an tel.