Real Madrid in second half-ah goal hnih an khung a, La Liga hmahruaitu Barcelona chu um chhunzawmin 2-0 in Osasuna an hneh.
Inrinni zanah Estadio El Sadar-ah Real Madrid in striker Karim Benzema chu inhliam vangin an chhawr thei lova. Tlarhmaah Vinicius Junior a pawimawh.
Brazilian forward hi kheltha hle in an goal nawrnaah a bul tantu a ni fo. Inkhel tan hnu lawkah a goal khung tur Osasuna keeper Sergio Herrera chuan vanneih angreng takin a dang per hlauh a. Second half tan tirah goal khung mahse offside avanga pawmsak a ni lo.
Minute 78-naah Federico Valverde goal khung tur a siamsak a. Minute 89-naah khung leh mahse offside avang bawkin pawm a ni lo.
Huntawp hma in Marco Asensio chuan Real goal hnihna a khung a, rawlthar substitute Alvaro Rodriguez chuan a siamsak tha hle.
Real hian Barca nen an inkar point nga in an tihniam lailawk a. Coach Carlo Ancelotti chuan, “Kan football khelh a tha a, hnehna pawimawh kan chang thei. La Liga inumna kan la tinung thei hi thil tha a ni. Kan that tawk loh laiin an tang tlat thei a, kan goal khung te a hun takah a ni a, kan inkhelhdan a lungawithlak.” tiin a sawi.