Point an hloh leh dawn niin lang hman mahse Arsenal in ‘champion zia’ an tilang. Huntawp dawnah goal hnih khungin 4-2 in Aston Villa lakah comeback hnehna an chang.
Inrinni zanah Villa Park-ah Gunners tan Jorginho-a’n minute 93-na a goal a a pet chuan crossbar a fuh a, Villa goalkeeper Emiliano Martinez hnungah fuhin goal-ah a lut.
Inkhel a tum hnih hma hruai Villa in goal khung leh ngei an tum a, huntawp hma a corner an hmuh chu na taka bawhin a letleh lam an veng zo lo. Arsenal substitute Gabriel Martinelli chuan an goal hnuhnung ber a khung ta zawk.
Villa hian first half-ah Ollie Watkins leh Philippe Coutinho hmangin tum hnih hma an hruai a. Hei hi Bukayo Saka leh Oleksandr Zinchenko ten Gunners tan an sut.
Arsenal hi a zawna match thum chak hmel hmu lova kal tawh an ni a. Hnehna an chan avangin Premier League table chung berah an kir.
Arsenal manager Mikel Arteta chuan, “Thil pahnih chiang takin a lang. First half-ah thil tereuhte te tihsual kan nei a, second half-ah mimal theuhin nkan theihna sang kan tilang a, hei hian inkhel a hril hle. Hnehna chan kan phu.” tiin a sawi.
City in point hloh
Manchester City in Premier League table chung bera kir leh theihna nei mahse an chhawr tangkai lo. Chance tam tak an neih khung thei lovin 1-1 in Nottingham Forest nen an inhnehtawk.
City in minute 41-naah Bernardo Silva hmangin goal mawi an nei. Erling Haaland chuan crossbar tih perin a per let a khung teuh. Aymeric Laporte pawhin huntha a nei.
Forest in City hriam loh chu remchangah an la a, minute 84-naah Chris Wood chuan a club tana a goal hmasa ber a khung.
City senior player Kyle Walker chuan, “Point hnih kan paih a ni a, chance kan ngah ngaihtuah chuan chak tur kan ni. Tumah mawhpuh theih a ni lo, a hmalam an vanduai ni a nih chuan defence in 1-0 kan humhim tur a ni.” tiin inkhel zawhah a sawi.
Blues tlawm zanah Reds chak
Premier League table laihawl a inum Chelsea leh Liverpool result a inang lo.
Chelsea in James Ward-Prowse freekick mawi an sut thei lova. 1-0 a tlawmin Graham Potter-a chungah ‘pressure’ a awm tan. Blues hi inelna hrang hrangah match 14 atang vawi hnih chiah an la chak.
Lehlamah Liverpool in Newcastle United lakah result pawimawh an nei. 2-0 in Newcastle United an hneh.
Magpies hi tun season a vawikhat chiah la tlawm an ni a, nimahsela 10-na leh 17-naah Darwin Nunez leh Cody Gakpo ten goal an khung hnuah minute 22-naah an goalkeeper Nick Pope hnawhchhuah a ni a. A tawp thlengin Liverpool tan awlsam bik lo mahse an mamawh point thum an hmu thei.