Meghalaya assembly inthlan lo awm tura chuh tum mi 375 zinga mi 21 chuan thubuai an nei mek niin Association for Democratic Reforms (ADR) chuan a tar lang.
Bial 60 inthlan hi February 27 hian neih a ni dawn a ni.
ADR-in chuh tumten an affidavit an thehluh an enchiannaah 233 chu national party mi an ni a, 69 chu state party-a mi an ni a, 29 chu party nghet ni lem lo leh mi 44 chu independent-a chuh tur an ni.
Congress candidate mi 60 zinga panga, NPP candidate 57 zinga paruk, BJP candidate 60 zinga pakhat leh AITC candidate 56 zinga pathum chuan an laka thubuai ziah luh a awm mek tih an affidavit-ah hian an tar lang a ni.
Thubuai nei zinga mi 15 (4%) chuan an laka thubuai awm mekte hi khirh tak, serious criminal case a nih thu an ziak a, kum 2018 inthlan kha chuan hetiang nei hi 21 (6%) an awm.
Serious case nei hi Congress leh NPP atanga pali ve ve, BJP atangin pakhat leh AITC candidate pahnih an ni.
NPP candidate 60 zinga 43 zet chu cheng vaibelchhia nei tling, crorepati niin a ngah ber an ni.
Candidate zawng zawngte hausak dan chawhrual hi Rs vaibelchhe 5.91 niin NPP candidate 60-te hausakna chawhrual chu Rs Vaibelchhe 10.68 a tling daih thung.
BJP candidate 56-te hausakna chawhrual chu Rs. Vaibelchhe 2.71 a ni a, Congress chu Rs Vaibelchhe 4.34 niin AITC candidate-te chu Rs Vaibelchhe 4.95 a ni.
UDP aiawha Mairang biala chuhtu, Metbah Lyngdoh chu candidate zinga hausa ber niin Rs Vaibelchhe 146 hu zel sum leh thil hlu a nei a ni.