Zu zawrh khapna, Nagaland chu February 27-a inthlan hmabak niin inthlan campaign a vanglai a ni a. Phek district-a hmeichhe pawl chuan check-gate siamin an district-a mite zu hmanga thlem an nih loh nan a lut tur dan an tum.
Phek-ah hian Chakhesang leh Pochury hnam chengin assembly bial panga a awm a, pali hi Chakhesang mite chennaa mi niin Meluri bialah Pochury hnam tlem azawng an awm bawk.
Inthlan bawra zu zalen lutuk thin chu duh lovin Chakhesang Mothers’ Association (CMA) hnuaia Chakhesang Naga nuho chuan check point 100 vel an huam chhungah an siam tih Phek-a CMA President Zhonel Tunyi chuan PTI a hrilh.
“Inthlan lai hian zua inthlem a nasa thin a, tharuma intihbuaina leh hmelmaa insiamna bakah inthahna thlengin a thlen phah thin,” a ti.
“Kan tum ber chu zalen, dik leh inthlemna awm lova inthlan a ni a. Tute mah thlem loh leh buaina awm lo a ni,” a ti.
Hei bakah hian inthlan lai hian zu ruiten zak lo takin candidate leh politics hruaitute hnena pawisa dil mai an ching thin bawk tih a sawi.
Hun dangah pawh zu hi an district-ah a lut nasa tih a pawm a, “Nu kan ni a, chhungkua leh mi mal thilah tih tur kan ngahin kumtluanin kan check thei lo va; mahse, inthlan laia voter-te thlemna atana hman nasat tal hi chu dan kan tum a ni,” a ti.
CMA hmalakna hi police chuan tha an ti hle tih an sawi a; mahse, dan kengkawhtu an nih loh avangin mi man an lo nei a nih chuan an kuta hlan zel tura an duh thu an sawi.
CMA chuan miin pangngai taka thil a ti a nih chuan buaina a awm ngai lo va, inthlan pawh muanawm takin a awm thei tih an sawi.
“Zan pawh mu lovin kan bei a, hei hi kan khawtlang leh kan thlahte tan zel a ni,” tiin Tunyi chuan a sawi.
Kawngpui liana lirtheite endik mai ni lovin khaw hrang hrangah pawh lirthei endik hi an kalpui a ni.