Aizawla Republic Venglai kawipui bula ATM booth chu Inrinni zing khan rawk tuma bomb a ni a, pawisa erawh ruk a ni lo va; he pawikhawihna chhuitu tur special investigation team din nghal a ni.
Aizawl district police hotuten an sawi danin, bomb puak hian ATM kawngkhar glass, ceiling, electric wiring, UPS/batteries, E-surveillance equipment leh signboard Rs 5,60,000 man hu a tichhia a. ATM khawl pawh chhe nual mah se pawisa awmna vault chu himin pawisa bo a awm lo thung. He thil titu hian ATM chhunga CCTV camera awm chu rawng kahna dumin a kap nia hriat a ni.
ATM booth bomb chhiat a nih chungchangah hian ATM neitu, NCR Corporation India Pvt. Ltd-a installation associate, A. Malsawmtluanga’n Inrinni khan Aizawl Police Station-ah FIR a thehlut a, thubuai ziahluh a ni.
Police hotute chuan ATM booth bomb chhiat chungchang chhuitu tur mi 11 awmna special investigation team (SIT) din nghal a nih thu an sawi a. Mipuite chu he thil thleng chungchanga information pawimawh an neih chuan Aizawl Police Station phone number 8794747291-ah hriattir turin an chah.
He thil titu hriaa police hnena report-tu hnenah Rs 20,000 pek an tum thu leh a report-tu nihna thupsak a nih tur thu an sawi bawk.